uMthunywa
KULWIWA impi enzima eTurffontein indawo eseJohannesburg, eSouth Africa phakathi kukamakoti lomamazala wakhe kubangwa indlu.
Kubikwa laba ababili bamisana mihla lamalanga bethethisana kubangwa indlu eyatshiywa ngumuyi uMichael Radebe obengumyeni kaThandi Hadebe.
UThandi uthi umkakhe usehlala evela emaphutsheni akhe emtshela ukuthi wayemthanda njalo ulokhu emthanda lasekufeni.
UThandi ubikele iphephandaba le Daily Sun ukuthi uMichael uyamhlupha ebusuku mihla yonke ngoba uyambona emaphutsheni.
“Yiloba umyeni wami engasekho emhlabeni uhlala evela njalonje emaphutsheni ami. Ngiyamkhumbula lami ngoba wayengithanda impela, ehlala engiphekela okumnandi. Akulasuku lapho esasingajabuli khona kodwa ukufa kungithathele isithandwa sami, labantwana angisazi ukuthi ngenzeni ngabo nanko phela umamazala ungibangisa indlu yomkami,” kutsho uThandi ehlengezela inyembezi.
Uthe ubuhlungu ngalokhu akwenziwa ngabakwabozala ikakhulu uninazala ngoba kamtshelanga lapho umkakhe ebhubha.
“Ngangingekho ngivakatshile eKwaZulu Natal ngesikhathi umkami esweleka. Ngezwa sengitshayelwe ucingo ngomunye umngane wami ethi umkami ubhubhe ngemva kokugula esibhedlela.
“Kwabanzima ukuthi ngikukholwe lokhu ngoba akula ngitsho loyedwa owangakibo kaMichael owangifonelayo ngesikhathi lokhu kusenzakala,” kutsho uThandi.
“Ngiyazi ukuthi umkami kafuni ukuthi mina labantwabami sidubeke yena watshiya umuzi esingazihlalela kuwo.
Uyeza kimi nxa ngilele angitshele okokwenza ngabantwana,” kutsho uThandi.
Uthe uninazala wamxotsha endlini ethi ayisiyo yakhe ngeyomntanakhe kungakho kaphume aphele.
“Engikufunayo nje yikuthi umamazala aphume aphele endlini. Ngeke ngidubeke labantwana mina ngilayo indlu eyatshiywa ngumyeni wami,” nguThandi lo.
Intatheli zivakatshele uninazala kaThandi uNkosikazi Radebe oleminyaka yokuzalwa engu-76, wathi uThandi watshiya umkakhe wakhetha ukuyahlala eKZN. Uthe uMichael watshiyela yena indlu kungakho-ke yena kayindawo kodwa uThandi ngeke ahlale kuleyondlu.
Intatheli zicele ukubona incwadi ezitshengisa ukuthi indlu ngekabani sibisibili uNkkz Radebe wehluleka ukuzitshengisa, wenelise nje ukukhipha ama-receipts atshengisa imali ezibhadalwa kumanisipala weJohannesburg. — Ubulembu
