uMthunywa
YiNtatheli kaMthunywa
ABAPHATHI beqembu lebhola lenyawo eleHwange bathi bemxotsha uNation Dube ngesizini edluleyo bacabanga ukuthi iqembu leHwange lizanqoba ikanti sebelidonsela ezikwakweni zika-Division One.
Kumaviki amabili adluleyo ubiziwe njalo uDube ukuthi azoqeqetsha izimbamgodi zeChipangano kulisizini.
UDube owaziwa ngelithi ‘uMalume’ kunguqu, uqale umsebenzi kuliviki njalo kukhangelelwe ukuthi ayiphendukise eyasemalehleni kunkundla zePSL ngesizini ezayo.
Umqeqetshi lo uzitshaye isifuba wathi ukuphenduka kuPSL kungumthwalo angeke awehluleke kodwa kuzamele yena labadlali bakhe basebenze gadalala.
“Kubuhlungu ukuthi iqembu lethu selibuyele emuva ku-Division One. Sikuvumile lokho njalo sesikhangele phambili sihlose ukunqoba kumidlalo yethu yonke. Kumele siphenduke kuPremier League ngokuphangisa,” kutsho umqeqetshi lo.
Akulamuntu ongamsola uDube ngokuzethemba ngoba kuzwakale ukuthi inkampani yeHwange Colliery izimisele ukusekela uDube leqembu.
UDube uzancediswa nguBrian Njobvu, ongumhlonitshwa kwezokuqeqetshwa kwenguqu kuleli.
Kubadlali abasehlelweni lukaDube kulo Taimon Mvula, Crispen Dickson, Shepherd Gadzikwa, Tendai Mate, Delic Murimba, Crybert Muvuti, Andrew Tshuma loMorestuff Ncube.
Abanye asebesayine isivumelwano sokudlalela iChipangano nguMelvin Mekiwa, Nomore Chinyerere, Justine Kaunda, Obert Moyo, Collen Muleya, Gilbert Zulu, Craven Banda lo Wilfred Munorwei.
Kuqembu eladlala nyakenye kulabadlali abahlanu abafulathele iqembu uCollen Phiri, Admire Banda, Oscar Lungu, Elvis Meleka loMorebrain Joseph.
Kwandise ukuthi iChipangano ithenge abadlali abavela kwezinye indawo kodwa kubikwa lokho akuyincedi.
Isinqumo esikhona esivela kubasekeli lenkokheli zethimu yikuthi iChipangano idlalelwe ngabafana abaphuma eHwange kuphela.
“Ithimu sizazama ukuthi iqine kakhulu ngoba sengiyilungiselele yaphelela.
“Indlela iHwange ezaphenduka ibukhali ngayo, izaphaphamisa amaqembu akade eyidelela,” kutsho uDube.
