uMthunywa
Thokozile Mbedzi
ZILOKHE zibabaza izakhamizi zesigabeni seGwayi, eNyamandlovu ngemva kokuba enye indoda idlwengule usana ngesikhathi iyethenga umumbu ngoLwesibili kuyonale iviki.
UHonest Phiri oleminyaka engu-39 yokuzalwa wesigabeni seLupanda eMasungamhuru 2 eLupane udlwengule usana lolu ngesikhathi esemzini kamakhelwane elande ukuyathenga umumbu.
Ekhuluma lentatheli kaMthunywa ulnspector Glory Banda uthe umsolwa kukhanya wadlwengula umntwana ngesikhathi emphethe.
“UHonest Phiri uhambe komakhelwane ngenhloso yokuyathenga umumbu wokuyagayisa.
“Ekufikeni kwakhe uhle wabika udaba lokuba uzethenga umumbu wakhipha imali ayezethenga ngayo waqhubela ugogo walapho ekhaya.
“Ugogo wamukela imali le engazi ukuba umakhelwane uzatshiya emenzele inkemenkeme yendaba. Wamane wathatha imali kuphela kazange acabangele ukuthi umakhelwane wakhe lo uzamenzela izigigaba.
“Umsolwa esethengile umumbu kasazange wasukuma ukuba abuyele ngakibo wala elokhu ehlezi ekwejisile.
“Ugogo wosane wacina enakana ukuba ayegeza watshiya umakhelwane ethi mhlawumbe usaphumula elosane olwalulele lwendlalelwe phansi.
U-Insp Banda uthe ugogo kazange athathe isikhathi waphangisa ukuphenduka.
“Uthe ethi mehlo suka wahlangabezana layo inkemenkeme nanko phela wabona umakhelwane wakhe ehlise ibhulugwe lisemlenzeni ephethe usane eludlwengula.
“Umetheswacala uthe ebona ugogo owayesehlaba umkhosi ebiza omakhelwane waphangisa wabeka umntwana phansi waqala ukucela uxolo ethi angatsheli abantu.
“Khonokho nje omakhelwane batheleka egumeni bahle babamba umsolwa bamusa emapholiseni.
“Umntwana wahle wasiwa esibhedlela eNyamandlovu Hospital ukuze ayehlolwa,” kuphetha ulnsp Banda.
