uMthunywa
Ethel Ncube
AKUBIZWA ozwayo ngempelaviki lapho usomahlaya odabuka eTsholotsho odumileyo kweleSouth Africa ezakwethulela abalandeli bakhe umdlalo wakhe omutsha olesihloko esithi ‘Inzipho zikasathane’.
UPromise Sibanda owazakala ngokuthi nguDj Mapressa uzakwethula lumdlalo athi abalandeli bakhe bazawuthokozelela impela.
Ekhuluma lentatheli uMapressa oveze ukuba konke sekume ngendlela yakhona uthe umdlalo usuphekwe wavuthwa ulinde ukuphakulelwa abalendeli nje kuphela.
DJ Mapressa
‘’Umdlalo usuphekwe wavuthwa sengilinde ilanga langoMgqibelo ukuba lifike ngiwethulele uzulu. Emcimbini lo nginxuse abantu abanengi abatshiyeneyo njalo kuzabuya abantu abavela emazweni atshiyeneyo afana leUnited Kingdom, Zimbabwe kanye leBotswana bezobona umdlalo lo uvulwa. Emcimbini lo umuntu ozathenga umdlalo wami ngemali ephezulu uzathola indondo elomfanekiso womdlalo wami,” kubika uMapressa
Uqhubekele phambili eveza ukuba umdlalo wakhe uzabe utholakala emazweni atshiyeneyo.
“Umdlalo wami uzabe utholakala emazweni atshiyeneyo ebantwini abawuthengisayo. Okwakhathesi ebulenjini awusoze ubekhona ngizaqala ngithengise amaDVD ngithi sengiwufaka ebulenjini. Osaziwayo abafana laboLion Stars, Dubia Masters, Insimbi zeZhwane, Fortue Dawu, Mxolisi Mr Bones, Dj Newza, France sebevezile ukuba bazabe bekhona.
Insimbi zeZhwane
“Kubalandeli bami ngithi wozani ngobunengi benu ngoba kuzabe kumnandi kakhulu,” nguMapressa lo.
Intatheli ixhumane lomunye umlandeli kaMapressa oseUnited Kingdom uManyanda oveze ukuba uwulinde ngamehlo abomvu umdlalo lo.
‘’Kuyangijabulisa ukubona umuntu weTsholotsho ikakhulu oyintanga yami esenza umsebenzi obukekayo.
“Ngapha thina siyilindile iDVD ngamehlo abomvu ngoba siyawazi umsebenzi wakhe, awukaze usidanise thina jengabalandeli bakhe.
“Siyilindile iDVD ngoba umsebenzi wakhe muhle kakhulu uhlala unconywa njalonje,” kubika uManyanda.
