uMthunywa
Nkosilathi Sibanda
AKUBIZWA ozwayo ngoMgqibelo elokitshini leNketa 7 emcimbini wokuthakazelela ukuzalwa komsakazi wodumo uSibonginkosi Maphosa, uBongie Diamond.
UBongie Diamond yintandokazi yamagagasi erediyo kuSkyz Metro FM. Kulimpelaviki uzabe ethakazelela iminyaka engu-40 yokuzalwa ebuthanisa abathandi bezomculo lapho okuzabe kuqhunsa uClement Magwaza, iNyambi Stars, Lights wakoBulawayo labanye abaphethe ezitshisayo kwezomculo.
Bongie Diamond
Umcimbi uzaqhutshelwa eNketa 7 Tavern lapho uBongie abika ukuba uhlose ukuthi akholise labantu.
“Akula okukhulu okwedlula ukuthakazelela ilanga lami lokuzalwa ngilabantu bakithi, abantu abangenza ngibe yilokhu engiyikho khona,” kutsho uBongi Diamond.
“Umcimbi useNketa 7 Tavern ngoMgqibelo. Ngikhethe ukuthi ngidibanise abaculi ababalisa uMagwaza loLights wakoBulawayo. Wozani ngobunengi benu sizokholisa mhla welanga lokuzalwa kwami.”
UClement Magwaza
“Njengomsakazi osebenza labantu bakoBulawayo lenengi labalaleli abakumhlubulo ongezansi yelizwe, ngithe ngizehlise ngiqoqe umbuthano wenjabulo, sijabule sisonke.”
UBongie ubalelwa kubasakazi bakuleli abalenhlonipho losekelo kubalandeli benhlelo zomsakazo. Uyingqungquthela kwezokukhankasela amalungelo abesifazane, ezemvelo, ezomculo, ezempilakahle kunye lokwazisa uzulu ngamalungelo akhe kwezepolitiki.
Ubike ukuba ngokukhula kwakhe kwezokusakaza, usebone kufanele ukuthi abelomlandu wokuthi abeseduzane lomphakathi, abelusizo kulabo abakhathazekileyo.
“Ngimgumsakazi, ngiyintatheli ngakho senginanzelele ukuthi lesi yiso isikhathi sokuthi ngiphathise labo abadinga usizo lwami. Yingakho ngemva komcimbi wangoMgqibelo ngizazimisela ukuthi ngisebenzise ukuba yimi kwami ukuncedisa lapho engenelisa khona.”
