uMthunywa
Nkosilathi Sibanda
USUKE kwekaMatshobana bengafuni ukuzwa ngaye ngoba besithi uhlelo lwakhe lwe-“ECD” alusebenzi kodwa akulamqeqetshi owenelisa ukungenisa abantu abanengi eBarbourfields ukwedlula yena.
UMadinda Ndlovu, engumqeqetshi weHighlanders ngesizini ka2018, wazakhela udumo ngokubumba iqembu labadlali elabukelwa ngabantu abanengi kumbali yePremier League kuminyaka edluleyo.
Ukuphenduka kwakhe kuleliqembu kwengeza amathemba wokuthi lonyaka ababukeli bazangena ngobunengi. Ngesizini edluleyo ibhola belibukelwa lihlekana nje, okukhathaze leziphathamandla zomdlalo ngoba bekungela mali ebingena ezikhwameni zenhlanganiso.
IBosso imemezele ngokuza kukaMadinda ngoMvulo ntambama. Uphiwe isikhundla sokuba ngumsekeli kamqeqetshi uBrito Baltemar. Uzaphinda njalo aqondise inhlelo zokwakhiwa kwamaqembu abasakhulayo.
Ngokukhangelisisa kwephephandaba likazulu, ukuphenduka kukaMadinda kulakho ukuba lomthelela ekukhwezeni inani labantu abangena bezobukela iHighlanders.
Mhlawumbe lePSL iyakholisa ngokuzwa ibizo likaMadinda kuBosso.
uMadinda Ndlovu
Inhlolisiso eyenziwe yintatheli kaMthunywa iveza ukuba iPSL yabika ukuba ekupheleni kwesizini ka2018, iBosso yayiphambili ngabalandeli abanengi abangena enkundleni.
Kwaba labalandeli lababukeli beHighlanders abanengi ababukeli imidlalo. Abangu-117 832 babhadalela ukubukela leliqembu kumidlalo engu-17 kusigaba sakuqala sesizini, ngokutsho kukaFarai Jere umgcinisihlalo wePSL.
Ngalowo mnyaka yonke imidlalo yePSL yabukelwa ngabantu abangu-442 808. UJere wabika ukuba ukudlala kweHighlanders kaMadinda yikho okwangenisa abantu enkundleni.
“Ukwanda kwabantu ababukela ibhola kwabangelwa yikudlala kweHighlanders ekuqaleni kwesizini. Abalandeli bayo beza ngobunengi babo,” nguJere lo ngo-2018.
Phezulu kwalokhu, inombolo zemidlalo ziveza ukuba ngo-2018, impumelelo kaMadinda ime ku-44 phesenti kumidlalo ayinqobayo engu-17. Ngaphansi kwakhe iqembu laba ngutshiki lobhanqa lamanye kumidlalo engu-14, lanqotshwa kumahlandla angu-15. UMthunywa uyakuveza ukuba ngaleso isikhathi uMadinda esesekhona, iqembu le-ECD lahlohla amabhola angu-40.
Loba uMadinda wenza okuhle, abalandeli beHighlanders lokhe bebambe isikhwili. Bafuna umqeqetshi lo aze leqhinga elingcono lokuzama ukuthi iqembu lithwale inkezo yeCastle Lager.
IHighlanders yacina ukunqoba iligi ngo-2006. UMadinda kakaze abeyintshantshu engumqeqetshi.
Umlandeli weBosso uMoses Nkomo usekele inyathelo leqembu wathi uMadinda nguye umqeqetshi olungileyo.
“Benze kuhle ngokubiza umntwana wekhaya. UMadinda uletha ulwazi esingeke saluthola kwabanye abaqeqetshi,” kutsho uNkomo obika ukuba wasekela iBosso mhla ezalwa.
UCain “SamaTsha” Tshabangu uthe loba bekujabulela ukuthi kukhethwe umuntu weBosso esikhundleni, abafuni ukuthi bacine sebetshaya ukhwelo nxa uMadinda eyehlulekile.
“Engaphindi lokho akwenzayo, edlalisa abafana ababedlala sengathi abafuni ukunqoba. Sifuna inkezo thina, yikho esikubhadalela ibhola.”
UMadinda ukhunjulwa ngeqembu lakhe le-ECD elibalisa uRay “Ndorindori” Lunga, McClive Phiri, Nigel Makumbe, Godfrey “Baba Jukwa” Makaruse labanye.
