uMthunywa
Pumulani Mpofu
IZIKHATHI ezinengi abantwana yibo abahlukumezekayo kakhulu nxa abazali besehlukana. Babasengozini ezinengi ezitshiyeneyo, omama izikhathi ezinengi bayake benze ezinye izinqumo bengacabangeli abanye becabangela bona bodwa. Izikhathi ezinengi kwande ukuthiwa omama yibo abalesihelo kodwa bakhona abanye abangacabangeli abantwana nxa sekuxatshanwa emulini.
Kule iviki ngithole ithuba lokuxoxisana logogo olomzukulu wakhe owathwala nzima ngesikhathi abazali bakhe besehlukana. Umama wakhe uLindiwe Sibanda wathi esehlukana loyise uThembani Ndlovu kwaba nzima ngoba baziqakathekisa bona abasakhangelanga umntwana lo abasebelaye. Umama womntwana wathwala okungokwakhe wayala okwazi yena yedwa, ubaba wathi esezithola esele yedwa losana wamthatha uMelody Ndlovu wayamtshiya kunina laye wathi usayazama impilo.
Laba ababili bahamba bajika itshoba abasakhumbulanga ukuthi batshiya umntwana, ugogo wasala esegcine umzukulu wakhe. UMelody wayengelancwadi yokuzalwa kodwa wahamba kunjalo esikolo. Uthe esesenza isigaba sesine ubaba omncane wakhe waseqala ukubona sengathi seyintombi, waqala ukumhahabela. Kwakungekho muntu ayengamtshela ngoba bonke babethembele kubaba omncane ukuthi abhadale zonke indleko zendlini ngakho wayengumuntu ohloniphekayo.
Uthe uyise omncane esemhlukumeze kwenela wabaleka umntwana waya kogogo omncane, wafika engumuntu ozokwethekela kasakhulumanga udaba lwakhe. Ugogo wakhe wamlandela umntwana kwakhanya ukuba kasafuni ukubuyela kogogo kodwa wayengakhulumi isizatho sakhe. Kuthe ngelikade umntwana wasetshela ugogo omncane ukuthi kuyini okumenza angafuni ukubuyela. Ugogo laye wasesiya emapholiseni ngoba enanzelela ukuthi umntwana usengozini, amapholisa ayidlulisela phambili indaba yacina isifike emthethwandaba ngoba lumntwana wayemncane eleminyaka elitshumi.
Kuthe sebefike emthethwandaba basebethi kufuneka incwadi yokuzalwa eyomntwana kwaswekuficakala ukuthi umntwana akazange ayithathiswe njalo abazali bakhe sebehlukana akukho muntu owaziyo ukuthi bonke bangaphi.
Ugogo omncane uMaMoyo wasesiya eTrinity Project ukuthi azame ukuthathisa umntwana incwadi yokuzalwa, wathi efika wethula udaba lwakhe. ETrinity Project waziswa ukuthi kumele azame ukuthola abangakibo kukamama womntwana ukuze basize ekuthatheleni umntwana incwadi yokuzalwa. Nxa engabathola usezabhalelwa incwadi yokuthi bachaze inkinga yabo bayebhalisa umntwana koMsitheli.
Ngenhlanhla enkulu ugogo wayesazi ukuthi abakomalukazana wakhe bahlala ngaphi, wasesiya badinga. Bakhanya bengabantu abalesifiso sokuthi umntwana athole incwadi yokuzalwa ngakho bancedisana logogo ukuthi bathathe incwadi yomntwana yokuzalwa ukwenzela ukuthi umntwana athole usizo.
Bahamba ogogo koMsitheli benelisa ukuthatha incwadi yomntwana yokuzalwa basebebuyela emthethwandaba lapho umntwana afika wathi yena loba umalume segwetshiwe usefuna ukuhlala logogo omncane ngakho kwasekuthiwa ayehlala khona ukwenzela ukuthi avikeleke laye enelise ukukhululeka.
Izikhathi ezinengi abazali nxa sebesehlukana bayalibala abantwana babo bekhangele ezabo impilo zodwa. Ngakho kasinanzeleleni abantwana ngoba banengi abantwana abadlwengulwayo kodwa bengatholi usizo.
Kasibananzeleleni abantwana ukuthi bavikelekile njalo lapho abahlala khona akukho muntu obahlukumezayo ngazo zonke indlela.
Abantwana bayisibusiso ngakho kasibapheni amalungelo abo, kasihlanganeni kuviki elizayo.
Umlobi utholakala kukheli ethi [email protected] , www.trinityproject.biz loba kunombolo zocingo ezithi 0773195 055.
