uMthunywa
Pumulani Mpofu
KUMULI yinye layinye kulezihlobo eziqakathekileyo njalo ezisisizayo nxa sokumele silotsholwe loba kulemfa yibo abasisizayo. Kuqakathekile ukubana abantu behlale besazi izihlobo zabo ukuze nxa besiba lenkinga bazi ukuthi babathola ngaphi. Kulezihlobo eziqakathekileyo kakhulu okumele sihlale sizazi ezigoqela omalume, obabakazi kanye labogogo abazala abazali bethu.
Ukufa yisifo esingeke sasibalekela ngakho-ke kubalulekile ukubana sihlale sisazana lezihlobo zethu ukuze nxa sesehlelwe yisifo sibe kwazi ukubana siqonde kubani ongasisiza ukuze sithole incwadi ezifana lezokuzakwa kanye lezokufa (birth and death certificates). Nxa singelazo izihlobo lezi akulula ukubana sithole ilungelo lethu lokwaziwa ngitsho lalapho sesithatha izithupha, izihlobo zethu yizo ezazi ngcono osobhuku kanye lezigaba lapho okungabe kuqhamuka khona abazali bethu .
Kule iviki ngithole ithuba lokuxoxisana logogo okuthiwa nguSihle Nxumalo. Ugogo ulendodakazi yakhe okuthiwa nguNtokozo Nxumalo. UNtokozo Nxumalo wabeletha indodana yakhe ethiwa nguSimon Dube kweyinye ikilinika edolobheni lakoBulawayo. Emva kokubeletha, uNtokozo watshiya uSimon elenyanga ezintathu kugogo wakhe esithi uya eGoli ukuze aziphilise njalo asebenzele indodana yakhe. Ekufikeni kwakhe kazange azihluphe ngokutshaya ucingo azise unina ngokubana wahamba njani njalo athumezele indodana yakhe impahla zokusebenzisa. Kusukela kumnyaka ka-2008 kuze kube lamuhla kakaze azwakale ukuba ungaphi njalo ukubana usaphila loba sewafa.
Ugogo uSihle Nxumalo weza eTrinity Project ukuze athole izeluleko zokubana angenza njani ukuze atholele umzukulu wakhe incwadi yokuzalwa. Okokuqala kumele abe lencwadi yokuzalwa (health card) kanye le birth confirmation record azakuyayithatha ekilinika (clinic) lapho esebhadale imali engange $4,60. Kumele njalo aqonde emapholiseni ayeloba i-affidavit etsho ukubana kwenzakalani ukuze acine etshiye umntwana. Kufuneka njalo aphathe incwadi yokuzalwa kukaNtokozo ukuze iveze sobala ubuhlobo phakathi kukaSihle loNtokozo.
USihle kumele ahambe lesithupha sakhe kanye lemali engange-$2 yokuthatha incwadi yokuzalwa. Wakwenza konke ugogo kaSimon waze waphumelela wathola incwadi yokuzalwa .
Ngiloba nje uSimon sowalithola ilungelo lakhe lokwaziwa njalo usefunda efana labo bonke abantwana.
Kasilondolozeni ubuhlobo bethu ngoba ngezinye insuku sizazidinga izihlobo ukuze zisiphathise ekutholeni amalungelo ethu afana lawokwaziwa.
Asihlanganeni njalo kuviki elizayo.
Umlobi utholakala kukheli ethi [email protected] loba kunombolo zocingo ezithi 0773195055.