uMthunywa
ABANTU abenza umsebenzi wokuthengisa umzimba eGweru bafundiswe ngokukuzivikela kugcikwane leHIV.
Lokhu kwenziwe ngokusebenzela ndawonye kwenhlanganiso yeNational Aids Council (Nac) leDreams.
IDreams itsho ukuthi Determined Resilient Empowered Aids Free Mentored and Safe njalo inhloso yayo yikunika ulwazi ngezempilakahle kwezobulili, ukwaba ulwazi lokulwisa ubudlwangudlwangu ebantwaneni abasafunda abaleminyaka ephakathi kwengu-15 kusiya ku-24 yokuzalwa kanye labesifazane.
Ngesikhathi kuvakatshelwe indawo le ensukwini ezimbalwa ezisanda kudlula yiNac kuxoxiswane lamanye amantombazana abagoqela uTendai (20) othi ucabanga ukutshiya umsebenzi wokuthengisa umzimba ukuthi enze ibhizimusi engamnika imali.
UTendai uthi wabalomntwana esesemncane okwabangela ukuthi ehluleke ukubuyela esikolo.
Abazali bakhe babhubha eleminyaka yokuzalwa engu-7 kungakho wagcinwa ngugogo wakhe.
Ngesikhathi ezithwala ijaha lakhe lala ukumgcina okwabangela ukuthi acine ehamba ezindlini zabantu edinga umsebenzi wezindlini waze wabeletha.
Omunye uyisekazi wakhe olozwelo nguye owayesala lomntwana emkhuthaza ukuthi adinge umsebenzi wezindlini.
Ngemva kokuxoxisana lamanye amantombazana ayezwana lawo, uTendai uthi yikho lapho afundiswa khona ngomsebenzi wokuthengisa umzimba.
“Ngazithwala ngileminyaka engu-13 yokuzalwa ngatshiya isikolo endleleni ngabeletha umntwana oyinkazana sengileminyaka engu-14,” utsho njalo.
“Ngaqala umsebenzi wokuthengisa umzimba umntanami eselenyanga ezingu-15 ngelatshwa imikhuhlane etshiyeneyo yemacansini ngoba ngangingazivikeli nxa ngihlangana labesilisa,” utsho njalo.
Uthe wahlangana labe Centre for Sexual Health and HIV/Aids Research Zimbabwe (CESHHAR) Zimbabwe okuyinhlanganiso eyamfundisa ngokuzivikela kumikhuhlane yemacansini.
“Okwakhathesi sengilolwazi, sengifundisa abanye njalo sengifisa ukutshiya umsebenzi wokuthengisa umzimba ukuthi ngiqale ibhizimusi yami, uhlupho olukhona yikuthi ibhizimusi kayihambi kulezinsuku elizweni kungakho inkuni loba izigqoko engifisa ukuzithengisa kungenzakala ukuthi zingathengwa,” utsho njalo.
U-Nac Gweru Urban District Aids Co-ordinator uMnumzana Murari Hwingwiri uthe bafundisa abesifazana lamantombazana abathengisa imzimba ukuthi benze amabhizimusi atshiyeneyo azabenza ukuthi babelenhloso yokuthi benelise ukuziphilisa lezimuli zabo.
