uMthunywa
YiNtatheli kaMthunywa
UMDLALO wesibili kuGroup B yomkhankaso wenkezo yeAfcon udlalwa namuhla.
Umdlalo lo ophakathi kweZimbabwe leSenegal ukuzinga eliphezulu kakhulu ngoba wonke amaqembu adinga ukunqoba ukuze abelesiqiniseko sokuthi azadlulela phambili. Kumdlalo wokuqala, amaWarriors eZimbabwe aphetha engutshiki lobhanqa 2-2 labafana beAlgeria enkundleni ye-Stade de Franceville.
AmaWarriors ahlohla loba ayibamba iAlgeria, aphezulu kokuthoba inhliziyo ngenxa yokukhutha amathuba amanengi wokuhlohla. Umgadli kuzwa uKnowledge Musona waphanga wakhitshwa, endaweni yakhe kwangena uMathew Rusike odlale encedisana loNyasha Mushweki kuhlandla lakuqala lomdlalo. IAlgeria yiyo eyaqala isiziba kodwa iZimbabwe yaphendula ngoKudakwashe Mahachi kwasekuhlohla loMushekwi ngombekwa.
IZimbabwe ingene kulumqhudelwano weAfcon inganikezwanga ithuba lokuthi izanqoba kodwa indlela edlale ngayo isikhukhumeze ukuzethemba kwabadlali.
UWillard Katsande ukaputeni usebenze nzima ukuvala abagadli kukanti ngaphambili kwenkundla uBilliat loMushweki bencediswe nguRusike. Abadlali laba bayinike amandla iZimbabwe yokuthi ibhaxabule iAlgeria kodwa kwehlula ekucineni.
Kuhlandla lakuqala, amaWarriors abelomdlalo omuhle njalo abalandeli bayo lakumazwe angomhlubulo wezansi yelizwe bebesazi ukuthi iphethe ithalenta.
Izinto ziye zatshintsha kakhulu kuhlandla lesibili ngoba iAlgeria ize ngamandla futhi kucaca ukuba iyifundile indlela edlale ngayo iZimbabwe kusigaba sokuqala. Bachithe isikhathi esinengi bedlalela ngemva abadlali beZimbabwe bakhohlwa ukuthi bebedlala kakuhle kusigaba sakuqala.
Kodwa kuthe kubuywa kukhefu lokuphumula, abadlali beZimbabwe bakhethe ukuhlala emuva lalapho ibhola labo lisiyaphambili.