uMthunywa
Listen Ndlovu
INKAMPANI ethengisa inhlanyelo eye-Prime Seeds isikhuthaze abalimi ukuba balime izihlahla zama-avocado ngoba zilomkambo omkhulu.
Intatheli kaMthunywa ikhulumisane loMnumzana Motion Mtengwa oyingcitshi kweze-horticulture kule inhlanganiso obike ukuba ama-avocado alula ukulima njalo enza kuhle endaweni ezitshiyeneyo ngoba kawakhethi indawo.
“Ama-avocado avuma kakhulu emhlabathini obomvu. Umlimi kumele aqinisekise ukuba indawo yakhe isifanele ukuba alime ama-avocado.
“Umhlabathi ungahlolwa ukuze kubonakale ukuthi ulokudla okwaneleyo. Umlimi angafaka njalo ifethalayiza ukungezelela umvundiso emhlabathini ukuze izihlahla zithole ukudla,” kutsho uMnu Mtengwa.
“Emkhathini wakweleZimbabwe ama-avocado akhula kuhle ngesikhathi sikaMabasa langoNcwabakazi.
Isikhudumezi somhlabathi siyabe siku 5 kusiya ku7,” kutsho uMnu Mtengwa.
Uqhubeke esithi, “Okuhle ngokulima ama-avocado yikuthi amabhizimusi amanengi athengisa ukudla lalaba abathengisa emkambo bawathenga ngobunengi benze ibhizimusi ngawo, ngakho umlimi ulakho ukuzenzela imali enhle ngesikhathi esifitshane,” kutsho uMnu Mtengwa.
“Umlimi kumele aqinisekise ukuba lapho ahlanyela khona isihlahla sakhe akula moya omnengi ngoba udala umona kuzithelo lapho ingatsha zingawiswa ngumoya umlimi abeselahlakelwa yinzuzo, “ kutsho uMnu Mtengwa.
