uMthunywa
Ophezulu Stinta
Siqhubeka lendatshana yethu elesihloko esithi uhlanga. UMazungu wayephakathi kokukhathazeka okukhulu ngomnyeni wakhe owayesephakathi kwesimo ayengasizwisisi. UNduduzo wabona ke kufanele ukuthi aphuthume ngokuphazima kwelihlo ayenceda izihlobo zakhe. Kazange ngitsho abesacabanga ngokugeza loba nje ukukhulula impahla zokulala ayezigqokile lokho wayezakubona phambili.
Ngaleyo kuseni uNduduzo laye wayengazange nje abuquthe amehlo la ayebomvu gebhu elele ebindana lemicabango kaNandi owayesemphambanisa ikhanda, lapho ecabanga ngendaba yokuphambana ikhanda wayezizwa etshaywa luvalo.
Into eyayisimethusa yikuthi izolo lokhu babexoxa ngayo leyondaba yokuphambana dukuduku umfowabo sehanjelwa zingqondo. Pho babezakuba yini ke ngokuphanjanelwa nguZakhele. Wayinyathela imota yatsho ngesimnyama iqonde emzini kaZakhele. Wayebuya njalo aziduduze ethi mhlawumbe uMazungu wayehlayaza nje. Kodwa uma egula kakhulu akukho ayengakwenza ngaphandle nje kokumgijimisela esibhedlela sase Mpumulo. Lapho ke kwaku zamnikeza ithuba lokubona uNandi. Lapho umcabango wakhe ufika kwelithi Nandi wayizwa inhliziyo yakhe idlaladlala.
Masinyane nje wayesefikile koZakhele, wangena wavele waqagwa yinsizwa eyayibulalele ngesudu yesinga eliphezulu. Wayethonta amanzi ngalelo langa egezile kungathi kukhona lapho ayemenywe khona. Lezi nsizwa zombili zaxhawulana zabingelelana ngokwazana okukhulu.UNduduzo wambuza uZakhele ngokuba ngocece wangahlalwa yimpukane ukuthi wayevele lubhekisa kobani njengoba kwakungesilo lelanga lokuya emsebenzini nje.
UZakhele kwangathi kawuzwa lowombuzo ngitsho ukuwuphendula.
UZakhele wambuka emsusa phansi wamusa phezulu kucaca nje ukuthi ikhona into le ayeyisola kuNduduzo lapha, loba nje wayemncoma ngelithi wenze kuhle wafika. Kulapho ke okwathi dlwe kuNduduzo ekhona esenanzelela ukuthi wayegqoke ezokulala. Kusenjalo uNduduzo wethuswa ngamagama ka Zakhele athi wona.. eyi ingiphethe kabi indaba yakho sithenjwa umuntu usethemba khona nje ukuthi… masingabe sisachitha isikhathi Madlokova kasiphuthume kungaze kugcwale esibhedlela. Wayesedidekile uNduduzo ukuthi ngempela liqiniso uZakhele sephambene.
