uMthunywa
Ophezulu Stinta
Umdlalo: Indlalifa ngubani:
Owalotshwa ngu N. S Sigogo.
Siqhubeka ngomdlalo wethu, ingxaki yokwabiwa kwelifa. Ngeviki edluleyo besixoxa ngokuqakatheka kwemvunulo yesintu, okubuya njalo kube yikuqakatheka kwemvunulo jikelele.
Enkundleni le sinanzelela amandla enkolo ebezikhona endulo abantu bebebambelele kuzo ngamandla abo wonke. Silandela amalungiselo ombuyiso kaMphunzo lapho abomdeni babevunule bephelele ngemvunulo yesiNtu labesilisa bephethe induku zabo zesiNtu ezikhomba amandla esilisa sabo.
Ingoma iyatsha okwamagama lapho sekubizwa umufi ukuba eze ekhaya, umuntu wonke ubonakala esegiya sengathi uholwa ngumoya othile. Yinkolo yokubuyiswa komuntu ofileyo edonselwa ekhaya ngenkolo yokuthi aze lapha ekhaya azokondla njalo alondoloze imuli kanye lempahla yalapha ekhaya.
Isiko lokubuyiswa komuntu ofileyo liyisimanga lona-ke linikeza umuntu osetshonile amandla lawo akade evele engelawo lalapho esaphila. Okunye njalo ngesiko leli kuyacaca nje ngokuqhutshwa kwalo ukuthi umuntu esaphila uyabe engahlonitshwa lokuhlonitshwa kodwa-ke ekufeni kwakhe seguquka ahlonitshwe okwamagama.
Phakathi kwengoma uMkhulumi kanye loNkala bavusa indaba evele ilukhophe ngabafana bakaMphunzo okusobala nje ukuthi ikhona induku ethukuzwe emqubeni ngabo, okungumadida ukuthi ilifa lingebiwa kuhle na lapho abafo bethukuzelene induku emqubeni.
UMkhulumi kusobala ukuthi nguye umuntu omdala okumele aphathe umsebenzi lo owokweba ilifa njengoba nje kulusuku lombuyiso. Uyayibona-ke laye impi ukuthi ihlomile njalo-ke njengendoda ukuthi lelo lifa uzalaba eguqe phezu kwenduku.
Engomunye ubengaxolisa ukuze angachithekelwa ligazi kodwa-ke kusobala ukuthi yindoda elesibindi ngoba uzimisele ukuguqa phezu kwenduku kuliwa, eyakhe inhloso yikufeza injongo ebekiweyo ize iphutshe kungakhathalekile ukuthi umumo wezinto ume kubi.
