uMthunywa
Ugwalo: Indlalifa ngubani olwalotshwa ngu N. S Sigogo
Ophezulu Stinta
SIQHUBEKA ngohlelo lwezifundo zethu esizithola emdlalweni wethu oyinsindabaphendule. Umdlalo oqukethe umnkantsho wendaba ohlaba ngaphakathi unamathele ethanjeni wome uthi qha.
Kulesifundo esikhulu esisithola kulomdlalo, esithi induku ayakhi muzi. Phakathi kweguma kuqakathekile.
Nxa kukhona okungahambi kuhle injayelo bekuyikuphakamisela owesifazana isandla kakhulu. Sinanzelela ukuthi owesifazana ubephathwa okwengane.
Bekungakhathalekile ukuthi angabe elombono olohlonzi olunganani wayengabalwa, kodwa ke wayebonakala ngokukhuzwa ngenduku.
UMphunzo ugajelwa yimizwa yolaka, simbona esexabana lomuntu omdala ophambi kwakhe loba kuthiwa ngowesifazana, uyisekazi akala lungelo lokumphakamisela isandla. Nxa sekuliwa kanje kakusela ndlela yokuthi abantu bangabuya bazwisisane kuhle.
Nxa ukuzwisisana sekuthethe leli zinga umdeni awenelisi ukuxazulula ingxaki zawo kulapho ke okuyabe sekudingeka khona umlamulankunzi. Kucina ke kuthatha isikhathi ukuletha ukuthula kanye lokuhlalisana egumeni.
Siyafunda njalo emdlalweni wethu ukuthi yebo imfihlo yimfihlo kulendlela yokuthi igcinwe iyimfihlo, kodwa kuqakathekile ukuthi ezinye imfihlo ziqale zixazululwe labakhethekileyo zingaphongu kuba yimfihlo nje elindela ilanga elimnyama.
Uyise wabo Mphunzo yebo wenza kuhle ukuthi avikele inkosikazi yakhe afihle elithi wavela wabuya ezithwele egumeni, kodwa ke ngabe loludaba kazange athule lalo alinde umbheda wokufa. Ekuqineni kwakhe ngabe wahlala phansi lomnewabo abantwana besakhula baxoxisana ngodaba lomntwana owabuya eliza libelethwe, lokhu kwakuzasiza ukuthi abantwana bazwisise iqiniso ngesikhathi bekhula kubelula lasekukhuleni kwabo.
Izinto ezifihlwayo kazifihlwe sezike zakhangelwa ngelihlo elibanzi ukuthi ikusasa yazo iqukethe mithelela bani ebazalini kanye lasebantwaneni. Izolo imfihlo ibiyimfihlo kodwa ke kulezi nsuku sesifundile ukuthi sidephise ilihlo esikhangela ngayo ukufihla imfihlo.
