uMthunywa
SITHATHELA indaba yethu lapho uKillem elandisela umfowabo uMzilakawulandelwa ngokusila kwakhe emlonyeni wengwenyama.
Kulapha esibona khona izithelo kanye lempumela yokuzimisela ekulweni impumela lembadalo yokuzinikelela ekuphumeleleni kwesizwe.
Kubanika isibindi kanye lethemba ukuthi bayilwa impi etshisayo njalo labo bazibona besinda lapho ababengela themba khona ukusila, kwaba ngumvuzo wamandla abo amakhulu kangaka kanye lokunikela ngempilo zabo, sikunanzelela lalapho uKillem elandisa ngelithi amadoda asebenza ngaleyo mini laye wazizwa esevuka uhlanga.
UMzilakawulandelwa wayeseqala ukuvakatshelwa yizethekeli ezitshiyeneyo, lokhu-ke kwasekucacisa ukuthi laye ngaleso sikhathi wayesengumuntu abangane bakhe sebelethuba lokuzombona baxoxe laye kabanzi ngezigaba zempilo ababedlule kuzo.
Ekuvaleliseni kukaKillem kwangena enye indoda eyayikhanya nje iyindoda ilomusa babingelelana loba nje uMzila wayelokhu ezama ukuyifanisa. Indoda le yazibika ukuthi yona yayinguNkosana Ntuli, enkundleni yabafo yayisaziwa ngelithi nguHlanzamahlwili.
Eseqambe lelogama kulapho okwathi dlwe khona kuMzila, wazizwa laye etshaywa luvalo.
Wayebhekane lendoda emadodeni, kwakuthi lalapho isitha sizama ukulandela umkhondo wakhe sivele nje sivalwe yinkungu umzila wakhe ungabonwa muntu, ekulweni kwakhe wayeguquka abe yisilwane ngokwaso, wayenzima.
Walandisa-ke udaba lwakhe lokuvakatshela uMzila esibhedlela lapha. Kusobala-ke ukuthi wayeselodaba lonke ngokulimala kukaMzila, umvakatshela nje evele esele lohlelo olucacileyo ngaye.
Walandisa-ke ukuthi yena wayehambela bonke abafo ababelimalele enkundleni yamadoda, abafo ababelimalele ukukhulula isizwe esimnyama.
Wawubabaza umsebenzi omkhulu abawenza eJibajiba, waze watsho ukuthi amagama abo ayeselotshiwe engwalweni zamaqhawe, umvuzo wabo omkhulu babezawuthola ubalindile eZimbabwe entsha, iZimbabwe yokuthula. Amazwi la aletha injabulo ngaphakathi kwenhliziyo laMzila, wazizwa esiba lethemba ngaphakathi kwenhliziyo yakhe.
