uMthunywa
SIQHUBEKA ngogwalo lwethu lapho uMzila wayesethole khona uncedo esibhedlela saseJelimani. Sinanzelela ukuqakatheka kobudlelwano obabukhona phakathi kwamanye amazwe kanye lamabandla amancinyane kumbe amaqembu ayezimisele ukulwela inkululeko yesizwe, inkululeko yomuntu onsundu elizweni leZimbabwe.
Kuyinto eqakathekileyo ukunanzelela ukuthi bakhona ababengayekeleli isizwe esinsundu ukuthi sizibonele sodwa, sizilwele sodwa ngokunanzelela lenswelo ababelazo kukhangelwa ngokuhlomela impi.
Okunye njalo esikunanzelela lapha egwalweni yikuqakatheka kokuthembeka lokugcina isifungo. USethekele udlula phakathi kwezigaba ezinzima ezibuhlungu njalo, ezinye njalo ezingamniki amandla njengomuntu wesifazana kodwa simbona esima isibindi, lapho isimo esasingamvumeli khona ukuthi asondele kuMzila kazange alahle ithemba kodwa yiso isikhathi esinanzelela khona ukuthi waqina waba lesibindi senyamazana wazibona laye ephuma lamaqhinga thile okusiza uMzila.
Simbona nje eseze efika elizweni elikude njemgaseJelimani, imizamo kaSethekele layo yayiphakathi kwakho konke lokho efisa nje ngenhliziyo yakhe yonke ukuthi uyise wengane yakhe asile aphephe njalo kulobubunzima ababedlula kubo. Ukwenza kukaSethekele lokhu kuyisibonakaliso seqiniso sothando lweqiniso, kazange amdele uSethekele lalapho sekunzima sekutshisa, waqina ngefindo lesibopho sakhe.
Ukuphiwa kwamathuba okuphumula kumbe ukuyakwelatshwa kanye lokucatsha njengoMzila kanje kwakubanika amathuba okuyahlanganisa ingqondo zabo benelise labo ukuxhumana lezinye inhlanganiso ezazingabacebisa zibahlomise ngamaqhinga atshiyeneyo ekuxazululeni inkinga ababephakathi kwazo ngempi yombangazwe le eyayisithanyela isizwe sabansundu.
Babesenelisa njalo ukuxhumana bona bodwa ngendlela ezithile bebonisana ngokuma komumo wezinto elizweni lakibo.
