uMthunywa
Ophezulu Stinta
KULELIVIKI sixoxa ngendatshana elesihloko esithi Inkanankana. Kundatshana le sihlangana labazali okucaca balindele umntanabo thize obekulesivumelwano sokuthi uzafika endlini yakwabo. UMnumzana Venter ukhulumisana lomkakhe uLettie ngelithi ingane yabo yenza izinto ngokudelela kanye lokuthatha izinto kancane lokungakhathali.
UVenter ufisa ukuthi umntanakhe ngabe uyathola intombi, athole yona ehlanyayo okwamagama ukuze imgobe, kusimo akuso esobuhlongandlebe. ULettie wayengavumelani lamazwi omkakhe ngendodana yabo, yena-ke wayebona umuntu omuhle aze afanise ngelithi mhlawumbe nje wayezobazisa ngodaba abalufisayo. UVenter sephelelwa yikubekezela sebona kungcono ukuthi azihambele emhlanganweni ngoba angeke abe esanelisa ukudlaliselwa isikhathi.
ULettie uyazama ukumncenga umkakhe ukuthi indodana yabo izwakale ilayezela ngokuqonqosela okukhulu ukuthi bayilindele bangaphambanisi, kwakumenza njalo atshaywe luvalo lapho ecabanga ngomlayezelo wendodana yabo.
UPiet kucaca wayesebaphoxe kakhulu abazali bakhe. UVenter wayeseze esesaba ngitsho lokubheka umabanakude ngoba ulakho ukuhlangana lento ezabahlaza okwamagama kucaca wayephathekile lakwezombangazwe loba zazingaphandle komthetho. Besabuzana befanisela isivalo savuleka wangena uPiet. Waxolisa ebazalini bakhe ngelithi ubebambeke emhlanganweni weSRC njengoba wayengumfundi weyunivesithi.
UVenter wayengavumelani lokuphatheka kwendodana yabo kwezombangazwe ngoba wayehle avuke ngolaka lwengonyama. UPiet uyakhathazeka ngokwenzakala elizweni elwisana lobandlululo olwaluphilisa abantu nzima elizweni laseNingizimu Africa. UVenter wayesefuna ukuzwa isiqokoqela sendaba okuyikho ababekubizelwe yilendodana yabo. Laye uPiet wahle wethuka lapho esebona ukuthi kumiwe ngaye, njalo engasaphatheki lalapho enanzelela ukuthi akemukeleki lapha ekhaya.
Ngelikade wavuleleka uPiet ngelithi kukhona okwakumkhathaza, udaba olwalungamphathanga kuhle. Wazibika njalo ukuthi wayeselecala. Lapho uVenter wayeseqhaqhazela lendevu lezi ebuza ukuthi kwakutheni. Wabazisa ukuthi wayesephambanise ingane yabantu, okwakubuhlungu yikuthi ingane le ayimithisileyo yayingelabo abazali njalo yayifunda iphakathi nje kwezifundo zayo.
