uMthunywa
Silo Ophezulu Stinta kugwalo
Sitshiye uGcaleka esephose elihlabayo kuDuvuza elitshiya umuntu ezidla izibindi ukuthi uzaba yini, ngala athi ‘Ulibambe lingatshoni pg 28. Sebephumile laba ababili uDuvuza waphendukela kuNomasiko embuza ukuthi wayelolwazi na ngala madoda ayephuma lapha ekhaya lapho wabuza ngolaka ezama ukuvimba uNomasiko ukuthi angaze nje ananzelela okwakwenzakala lapha.
UNomasiko waye lawo umfanekiso wale insizwa elandisa ukuthi wayembona ehamba loMkhuphulankunzi kodwa kazange amchazele okuya ngaphi ngaye.
UNomasiko kwasekunzima ukuthi athule ngoba le yayiyindaba eyayimsinda. Wayesekhala ngelokuthi wayezawathini amehlo abantu lapho sebezwile ukuthi watshada lombulali.
UDuvuza wavele wayiciba leyondaba wancenga inkosikazi yakhe ukuthi akamsize nje ngamacebo okuphepha kuleli langabi elaselimhahabela. UNomasiko wamcebisa ukuthi kwakuzamnceda ukwazisa abomdeni ngodaba lolu, nanku phela amasongo akhala emabili.
Wazidela wayabacela ukuthi kukhona okwakungamphathi kuhle ecela nje babelaye ekhaya lapha. Wala wagomela ukuthi abachazele imbangela yokungaphatheki kwakhe.
Wakubona kungcono ayolanda loSikhuni inyanga eyayingabhadwa lapha esigabeni. Bayifunda ivaliwe ukuthi lukhulu olwalukhona. USikhuni laye wenza khona kanye ayedume ngakho wabancedisa wavele wabacaba ngezokubaqinisa
Balinda balinda ukuthi wayezathutsha uGcaleka baze bonwaba. Kuthe ngelanga lesithathu lathwala izulu lingalindelekile laba mnyama tshu. Lapho kwaqubuka iyezi elalimnyama tshu elavela lakhithiza izulu elalilandelwa ngonganani umdumo.
Laliphosa imibane iphambane lapha endlini. USikhuni laye wananzelela ukuthi zimbi indaba wazama ukutshisa imithi ethize bancinda bonke, hayi lwehla uvalo ngoba izulu lezwakala selidumela le kude lingathi liyedlula.
Babengabuzanga elangeni mhlalokho.
Ngokuphazima kwelihlo balizwa seliduma emnyango. Lapho uDuvuza wabaleka waqonda emsamo kwakucaca nje ukuthi kulapho elalihlose khona. Wasukuma wayahlala eceleni kukaNomasiko, esemanzi te luvalo. Laphinda latsho ngomdumo omkhulu lapho lahle lamthatha uDuvuza wahle wanaba thwitshi.
Kwazanywa ngayo yonke imihlobo yemithi kodwa phinde, labe lidume ledlula. Agcwaliseke akaGcaleka athi, ulibambe lingashoni.”
