uMthunywa
Imbongi nguMihla Sitsha
Njengoba isihloko senkondlo le sizichaza, imbongi ikhuthaza abantu beZimbabwe ukuthi babambane elizweni labo leZimbabwe. Imbongi ithi abantu ababambane okwentungo zendlu.
Abalwaziyo uphahla lwezindlu zesiNtu bangafakaza ukubambana kwentungo zendlu zivela kundawo ezehlukeneyo kodwa zihlangane lapho okuba lesicholo sendlu khona. Ngakho-ke imbongi ithi lanxa abantu beyimihlobo etshiyeneyo bevela kuzindawo ezehlukeneyo kodwa kababambane njengamaZimbabwe.
Ngesifaniso imbongi ikhuthaza ukuthi abantu kabathandane kakhulu. Lokhu kuchazwa yila amazwi,
“Sithandan’okwamathe lolimi.” Imbongi ithi kabathandane kakhulu abantu hatshi ukuzondana njengalokho okwenziwa yingwe lenja. Kazibonani ingwe lenja. Nxa ufuna ukuzwa ngolaka lwengwe buza umzingeli owake wavusana lengwe elenja. Iqhubekela phambili ikhuthaza ukuthula ngoba nanku ithi uchuku emdakeni munye kaluphele.
Lapha sibona imbongi ingavumelani lempi yomdeni ngoba uthi ulunya emdakeni munye, ebantwini banye kaluphele.
Isikuveza obala imbongi isisitshela ukuthi singabandlululani njengabantu beZimbabwe. Akufanelanga kubekhona iShona kumbe kubekhona iNdebele. Lokhu kuveza mgceke ukuthi abantu akufanelanga babandlululane ngemihlobo ngoba sonke singabantu banye beZimbabwe.
Iyaqhubeka imbongi ikhuthaza abantu ukuthi kabahloniphe okwenzakala ngo1987. Lapha usikhumbuza ngokubambana okwabakhona phakathi kwamabandla amabili ezombusazwe i-Zanu le-Zapu ukuze kuqedwe ukulwa okwakukhona eZimbabwe okwemihlobo etshiyeneyo.
Lanxa kunjalo kukhanya aluphelanga ubandlululo ngoba imbongi iyaqamba lapha olukhona lolobandlululo. Imbongi isitshela ukuthi emabhawa siyabandlululana. Emabhasini lakho siyabandlululana. Ezitolo lakho yikho lokho siyabandlululana ngemihlobo.
Emsebenzini lakho siyabandlululana yikho imbongi ibuza ukuthi pho nxa sisenzenje thina abantu abamnyama, umlungu yena enzeni? Okusobala lanxa imbongi ingakutsho lapha yikuthi umlungu uyabe ehleka ethi,
“Yekel’zibulalane.” Lanxa kunjalo imbongi ipha ithemba lapha ukuthi okungapheliyo kuyahlola ngoba layo impi iphetha isiphelile. Iyaxwayisa imbongi ukuthi ubandlululo olusebantwini kumele luphele. Imbongi ithi lukhona lolubandlululo.
Okuvelayo lapha yikuthi lolu bandlululo kwezinye izibanga alwenziwa mgceke ngoba imbongi ithi lanxa lusenziwa lucatshe ngomunwe kodwa bona abalamehlo eziphundu bayalubona. Lapha uveza ukuthi bona njengababtu abahlolisisa bacungule izinto bayalubona ubandlululo lanxa abantu belwenza bethi bacatshile kababonwa.
