uMthunywa
P Mpofu
Ugwalo — Ugqozi Lwezimbongi
Imbongi nguN S Sigogo
NXA siqala ukuhlaziya le inkondlo ukuthi ingani, siyazibuza ukuthi yikulala bani lokhu imbongi ekhuluma ngakho? Kambe yilokhu kulala esikwenzayo nxa sesifikelwe yibuthongo sekuhlwile ntambama kumbe ngokunye ukulala?
Ukulala konke esikwenzayo kuletha ukuphumula. Olele ngenxa yobuthongo uthola ukuphumula kanti lolele okokufa kuthiwa uyaphumula kumbe uphumule. Abantu sifa ngendlela ezinengi, abanye bagula imikhuhlane engaqedakaliyo kodwa ikhanya ibuhlungu kakhulu.
Abadlula kumbe abafa ngendlela enjalo kuthiwa baphumule. Imbongi lapha icela ukuba kayilale iphumule.
Nxa siyifunda sihamba layo linkondlo kuyavela sobala ukuthi lokhu kulala imbongi ekhuluma ngakho yikufa. Ifisa ukulala iphumule imbongi.
Ekuqaleni kungathi imbongi ikhuluma ngalokhu kulala ubuthongo nxa umuntu esediniwe ngoba ithi: “Kangilale ngiphumule Ngaphansi kwezihlahl’ezimithunzi Laph’izinyoni zibhuza khona njalonjalo Zifisel’amahlob’ukusondela. Utshani ngifis’obuluhlaza. Lapho-ke kangiphumule.”
Aluba inkondlo ingama khonalapha singathi imbongi ifisa ukuzilalela emthunzini omnandi emva kokuba isikhathele kakhulu ngemva kokusebenza nzima.
Kanti, hatshi, ikhuluma ngokufa lapho okwehlukana khona umzimba lomphefumulo. Imbongi itshela umzimba lo obuthakathaka ukuthi kawuvumele umoya wakhe ukuphumula.
Ngokuzwisisa kwami imbongi isikufuna ukufa yikho itshela umzimba lo osubuthakathaka ngenxa yokugula mhlawumbe ukuthi kawuvumele ukufa wehlukane lomoya.
Ufuna ukuphumula duze lemikhaya emikhulu lapho inyoka ingasoze ifinyelele khona. Le yindawo lapho imbongi efisa ukulondolozwa khona nxa isifile.
Ithi kayilale iphumule imbongi kuwo wonke amadino. Nxa umuntu esefile uphumula kuwo wonke amadino ngoba uyabe esebenza ngesikhathi ephila kulo umhlaba njalo engabe ephumula kumadino okugula.
Abanye abantu bafa sebegule imikhuhlane ebuhlungu okwesikhathi eside.
Ifisa ukuba ingcwatshe igqitshelwe sengathi yikwembathiswa okokucina ilale iphumule. Umuntu nxa esefile ungena yedwa kuthuna lakhe. Imbongi yikho efisa kwenzakale kuyo.
Ifisa ukuba ilale yodwa sazimu umphefumulo uphele ubeluthuli lwebusika. Siyazazi intuli ezibakhona ngesikhathi sebusika. Imbongi ifisa umphefumulo wayo ube luthuli ungaze wabakhona njalo.
Isifiso sayo sikhulu imbongi ngoba ifisa ukuthi ilale iphumule duze kwabokhokho bayo sadlozi itshiye inhlupho zomhlaba.
“Ngitshiye uxukuxo lomhlaba lezifo ezingelakuphela.” Isidiniwe imbongi ngenhlupho kanye lokuxokozela okusemhlabeni, ngalokho isifisa ukufa itshiyane lakho konke lokhu.
Isizilinganisa lamakhosi oTshaka laboDingani bona asebafayo ukuthi pho yena yini, ilani yena ezweni? Ngumuntukazana yena okungelandaba lanxa efile njengoba kwafa amakhosi ayebusa izizwe enothile.
