uMthunywa
Charles Dube
SIHLANGANA lomuntu okungaba yiyo le imbongi ikhumbula ngendulo, okwakudala. Kulomkhumbulo ngendulo ngoba umhlaba ukhanya usuguqukile izinto azisahambi ngendlela eqondileyo okwenza lo okhangeleyo akhumbule ngokwakusenzakala kudala. Sekukhatshana emuva, yikho imbongi ize ithi khatshana le! Igcizelela ngesibabazo.
Indulo ikhunjulwa nje ngoba impilo yayilula. Siyezwa ukuthi kwakudliwa kungalinywa. Kwakukunengi ukudla abantu ababekuthola egangeni likaMdali kungadingeki ukuthi basebenze nzima belima ukuze badle. Babehamba nqunu abantu befaka imitsha, amabhetshu kanye lemisisi. Izalukazi lazo zazifaka amacholo ekhanda kuthi abanye bafake izidlodlo bewuhlonipha umhlaba.Kwakungadingeki ukuthi abantu basebenzise imali belungisa inwele emakhanda.
Kwakudliwa inyama endulo hatshi lokhu okwenzakala khathesi inyama isiyivelakancinyane ekudleni kwabantu.
Imbongi ithi iyadana nxa ikhumbula endulo. Iyakhumbula endulo emuva khatshana le! Ngobukhatshana lobu igcizelela ukuthi obekusenziwa endulo akusekho akusabonakali. Imbongi ikhumbula endulo lapho amadoda ayehlala ehlomile ephethe amawisa, induku ezinkulu phela, amahawu lemikhonto yokuzivikela. Lokhu kutshengisa ukuthi kwakuliwa loba ngasiphi isikhathi yikho amadoda ayehlala elungele ukuzicupha loba nini.
Ukufa komuntu kwakungasinto eyesabekayo kodwa kwakuyinhlekisa nje. Endulo amadoda ayelezibindi ngoba ayedumela ingonyama/izilwane ngezandla. Lezi yizilwane ezesabekayo okungadlalelwa duze lazo kodwa amadoda akudala ayezibamba ngezandla kutshengisa izibindi lokungesabi ukufa. Abantu babelenhlonipho bewahlonipha amakhosi abo. Siyezwa ukuthi, “Lapho lalingaphikiswa khona ilizwi lenkosi, lapho konke okwakusenziwa kwakusenzelwa inkosi.” Konke lokhu akusenzeki yikho nje imbongi ithi iyadana uma ikhumbula endulo.
Kayikhohlwa ngendulo imbongi yikho iqala izigaba zenkondlo yayo ezinhlanu phakathi kweziyisitshiyangalombili ngokuthi: “Ngikhumbul’endulo khatshana le! Okunye ekukhumbulayo imbongi okwakusenzeka kudala yikuthi intombi zazikhula zibengamaqhikiza. Ngamanye amazwi kutsho ukuthi intombi zazikhula zifike ebuntombini obugcweleyo zingagijimeli ukukhomba amajaha kumbe ukwenda zisebancane njengalokhu okwenzakala khathesi, uchago lalo selutenda labafana.
Insizwa lazo zazikhula ziqine zibe ngamajaha. Amaxhegu ayefela empini hatshi ukufela ekhaya sebephelelwe ngumphako. Ayefela empini amaxhegu engawazi umphungo wamanina lakancinyane. Ayezila isifazana amaxhegu nxa esempini. Amadoda ayehlale edale lawo wodwa bengafuthwa yintuthu yemkulwini lapho amanina aphekela khona. Kunjalo nje amadoda akudala ayengasidli isitshwala esiphekwe ngumdlezane. Ibuhlungu imbongi nxa ikhumbula ubuhle bakudala ibuqathanisa lobubi ebubona khathesi eze ichiphize inyembezi ngokukhumbula.
Izaqhutshwa ngesikhathi esizayo le inkondlo.
