uMthunywa
Ezivusa Usinga luqoqwe lwahlelwa yiLiterature Bureau, lwakhitshwa yiMambo Press
Imbongi nguDavid N Ncube
Isihloko senkondlo – Ubabhemi kababa
Lo okhulumayo enkondlweni ethi, Ubabhemi kababa, okungaba yimbongi uncoma ubabhemi kayise osemdala njalo osebenza ngobunono obukhulu. Okusekela ukuthi ubabhemi lo usemdala kakhulu yikuthi kasabonisisi kuhle, usebona luvilibana. Akusinto emangalisayo kulo okhulumayo ngoba vele usemdala ubabhemi lo. Kuyimvelo ukuthi inyamazana esindala ingaboni kuhle.
Kuyagcizelelwa ukuthi usemdala lo ubabhemi, njalo siyatshelwa ukuthi ibizo lembongi le nguKofi. Iyamthanda ubabhemi lo imbongi ngoba elalela lokho okuthiwa akwenze. Imbongi ithi ukhuluma laye ubabhemi lo akuzwe lanxa engaphenduli ngoba inyamazana vele kazikhulumi. Wenza kuhle ubabhemi lo okwenza imbongi imthande kakhulu. Wenza kuhle kulokho akwenzayo. Isibonelo salokhu sisibona lapho ethi loba esiyacholisa esigayweni, ethwele isaka emhlane, kaphambuki endleleni.
Kuvela sobala ngalokhu ukuthi ubabhemi lo uqonda lapho okumele aye khona ngoba nansi lendlela eya ekucholeni uyazi njengeyemfuleni lapho anatha khona.
Ulungile ubabhemi lo ngoba khonapho besiya ekucholeni isaka nxa lingasamanga kuhle, uyama ubabhemi kayise lowo alilungise. Engaqeda uyatshingizela njalo ubabhemi lowo. Endleleni imbongi ibona umtshwankela uvuthiwe iwudle ngamandla, izitike njengoba iwuthanda.
Nxa imbongi izitika ngomtshwankela ubabhemi kayise kamanga uyaqhubeka ngohambo lwakhe elubhekise ekhaya.
Ngokuthembeka kwakhe ubabhemi lowo, imbongi imfica esefikile ekhaya isaka eselilahlele emnyango wasemkulwini.
Kambe kulokuthembeka okwedlula lokho? Iyaziqhenya ngobabhemi wayo imbongi kwabanye abantu ize ibuze ukuthi: “Kamb’ ulaye yini, ubabhem’ ofana lowami?”
Lanxa kunjalo kukhona okungahambi kuhle ngobabhemi lo othandwa kangaka. Udliwa yimikhaza ngoba kuthiwa indlebe yakhe yokhohlo seyaze yalengela phansi ngenxa yokudliwa yimikhaza. Eyokunene layo kayicezwanga yimikhaza ngoba layo isidliwe yasala isimise okophondo lukabhejane. Lanxa esemdala kodwa ukhuluphele ubabhemi lo. Abantwabakhe oTshali loStimboko kudala bafa. Sekuyiminyaka ethile bafa labo bantwabayo.
Iyaphinda njalo imbongi igcicezela ukuthi mdala ubabhemi, uKofi. Imbongi iyasivezela njalo ukuthi uyise wametha njani lelobizo uKofi. Imbongi ithi uyise wayekhumbula iminyaka leya ephekela amakhiwa ikofi eFredi, emgodini wemali. Imbongi ithi iyambuka uKofi emi ngale kwejiko lomuzi, ewubuka umuzi omdala.
Uwubuka lomuzi ngoba buphekiwe utshwala laye uzazuza insipho. Athi nxa eseqede ukuzidla aye emthunzini, elule umzimba wakhe okomuntu omdala ephumula.
Imbongi iphetha inkondlo yayo ngokukhuthaza uKofi, ubabhemi kayise ukuthi kaphumule.
