uMthunywa
AMAZWE omhlaba okubalwa lelakuleli, ahleli lubhojozi njengoba sekubalwa izinsuku ngaphambi kokuthi uphele umnyaka ngoba awazi ukuthi igcikwane leCovid-19 eselizitshintshile i-omicron, lizosiphatha njani.
Lolu hlobo lwegcikwane luhanqe abantu abanengi ngesikhatshana kanti kumanje sisesigabeni sesine sokuhlasela kweCovid-19, futhi kusekunengi okungaziwa ngalo.
Ososayensi basalicwaninga futhi kulethemba lokuthi kungenzeka kungabi kubi kakhulu ngoba abantu abanengi sebehlatshiswe ijekiseni yeCovid-19.
Okwamanje kuthiwa ukuhlatshwa yikho kuphela okusiza abantu abahlaselwa ligcikwane, ukuthi bangaguli kakhulu.
Kepha kuselabantu abanengi, abangayingeni indaba yokuhlatshwa ngemva kokuba kuvele ukuthi i-omicron iyabahlasela labantu asebehlatshiwe, loba bengaguli kakhulu uma beqathaniswa labahlatshiweyo.
Okunye okwenza abantu babemanqikanqika ngamajekiseni yikuthi kulamahemuhemu okuthi wehlelwa ngamandla ngemva kwezinyanga eziyisithupha umuntu ehlatshiwe, bese kudingeka ukuthi agome ngomunye wokwengeza amandla,(booster shots). Abasebenzi bezempilo abayingxenye yokuchwayisisa iSisonke, sebeqalile ukuhlatshwa amajekiseni okwengeza amandla.
I-omicron ilandela iDelta ebihlasele kakhulu ngoNtulikazi, ngehlandla lesithathu leCovid-19.
Ukuhlasela kweCorona kuveze izinkinga ezinengi kwezempilo njengoba kuvela ukuthi kulezivumelwano ezingalandelwa ngamanye amazwe, futhi zenziwa eminyakeni edlule, ezinjenge-Abuja Declaration.
Lesi sivumelwano sasayinwa yiwo wonke amazwe ngesokuthi amazwe engeze ibhajethi yezempilo emazweni awo nge-15% njalo ngomnyaka.
Lesi sivumelwano senziwa ngo-2000 kodwa kuze kube manje amazwe amanengi athi ayikho imali eyengeziwe ayibekele ezempilo. Kuthe uma kugasela iCorona, kwacaca ukuthi kunengi okusamele kwenziwe ukuze kuthuthukiswe ezempilo zikwazi ukubhekana lempilakahle yezigulane.
Kuvele ukuthi i-Afrika, ayikwazi ukuzikhiqizela imigomo yethembele emazweni aphetsheya.
Imigomo yeCovid-19 ayithenga phetsheya njengoba ihlasele emhlabeni wonke, kanti labanikazi bezinkampani ezikhiqiza imithi, aqala ngokwenzela amazwe awo.
Amazwe aphetsheya yiwo afaka imali enengi yokuthuthukisa ezempilo e-Afrika.
Njengoba kuhlasele ubhubhane ukwelatshwa kwezinye izifo kuphazamisekile ngoba bekubhekelwe lona kanti lokhu kungadala ukuthi ngesikhathi esizayo kube lezinkinga ngoba izifo zingase zingalawuleki.
Ukuhlasela kweCorona edala isifo seCovid-19, kuholele ekutheni amazwe ehluleke ukufeza amasu okuqeda isandulela ngculazi ngo-2030, ngokuthi lonyaka abantu abangaba yi95% bazihlole ukuthi abalayo yini iHIV, u95% walabo abathola ukuthi balegcikwane baqale ukuthola amaphilisi okugcindezela igcikwane leli, kuthi 95% kube ngabakuhlelo lokunatha amaphilisi ukuze igcikwane lingabe lisabonakala egazini, i-95-95-95.
