uMthunywa
Johas Moyo
INHLANGANISO yeAgritex ikhuthaza abalimi ukuthi bafuye inyosi ngoba sokubonakale ukuthi balutshwana abazifuyayo kukanti zilakho ukubatholisa inzuzo enhle.
UMnumzana Alpha Ndlovu onguAgricultural Specialist esabelweni seMatabeleland North ukhuthaze abalimi ukuthi bafuye inyosi njalo bangathandabuzi ukuzofunda indlela eziqondileyo zokuzifuya.
UMnu Ndlovu uthe inyosi ziyalungiselwa indawo lapho umlimi angazigcina khona, kungaba ngumkolo kumbe amagabha njalo kumele kube lamanzi, umthunzi kanye lezihlahla ezilamaluba ukuze inyosi zithole ukudla okunengi.
UMnu Ndlovu uqhubekele phambili esithi inyosi zingasetshenziswa ukwenza imithi yokwelapha izifo ezitshiyeneyo ezigoqela uphepha kanye lemvukuzane.
Uthe ngokunjalo kubalulekile-ke ukuthi abalimi balandele indlela eqondileyo yokuzithatha ukuze zingafi kanye lamachaphazi.
“Umlimi nxa ethengisa uluju akumelanga aluthele amanzi kumbe afake itshukela phakathi ngoba luyabe lungaselawo amandla okwelapha. Kukanti labo abaluthengisa lusemihaheni…….. ,” kutsho uMnu Ndlovu.
Uthe ukuze umlimi enelise ukuthola uluju olunengi kumele azilungisele indawo enhle.
Uqhubekele phambili njalo uMnu Ndlovu ngokukhuthaza abalimi abafuya inyosi ukuthi kabasebenzise inyosi ezingaphekwanga ukuthengisela abantu njalo uphinde wabakhuthaza ukuthi basebenzise imihaha injalo, kayithengiswelwe abantu ingakaphekwa yakhutshwa ukudla okuyikho okufunekayo (not diluted) ngoba inengi labafuyi benyosi sebandise ukuthengisela abantu inyosi ezingalungiswanga kuhle lezithelwe amanzi.
Uphethe ngokucebisa labo abalesifiso sokufuya inyosi ukuthi kumele badinge imvumo yokugamula izihlahla ikakhulu labo abathapha emaguswini kumele bathole incwadi evela kwabe Environmental Management Agency (EMA) etshengisa ukuthi kababhidlizi izihlahla.
“Abafisa ukuthapha inyosi egangeni kumele babe lencwadi evela kwabeEMA ukuze kuphumele egcekeni ukuthi kabasoze babhidlize imvelo ngokugamula izihlahla kanye lokubulala inyosi,” kuphetha uMnu Ndlovu.
