uMthunywa
Cornelius Luphahla
KUBE yisiphansi phezulu elokitshini leMzilikazi koBulawayo lapho eyinye indoda etshaye khona umngane wayo kabuhlungu ngembodlela bebanga i50 cents yotshwala.
Impi le yenzakale ngoMgqibelo kuviki ephelileyo lapho uMnumzana Joshua Mathe atshaye khona umngane wakhe, uMnumzana Prince Nkomo ngembodlela wamkhumula amazinyo amabili.
UMthunywa ukhulumisane loMnumzana Eric Moyo othe okwenze uMathe atshaye umngane wakhe yikuthi ubedakwe kakhulu.
“Sathi sesiqede utshwala esasilabo uNkomo wayesele le-50c kodwa esesala ukuthi sihlanganise sithenge obunye.
Kuthe kunjalo sazama ukumthathela ngoba wayesenathe obethu utshwala yena wasesitshaya.
“Isenzo lesi sacunula uMathe wadobha imbodlela wamtshaya wamkhumula amazinyo amabili aphambili. Ngemva kwalokho ngalamula ngoba wayelokhu emtshaya ngembodlela ngasengibiza abantu sathwalela uNkomo esibhedlela,” kutsho uMnu Moyo.
Ebuzwa ngale indaba uMnu Mathe uvumile ukuthi uyayazi wathi kodwa yena wayedakwe kakhulu ngakho kakwazi ukuthi kwahamba njani.
“Kuliqiniso sibili ukuthi ngixabane loNkomo kuviki ephelileyo kodwa mina ngangidakwe kakhulu, kangikwazi ukuthi kwahamba njani ngize ngilwe. Ngokunjalo uNkomo ngamxolisa ngemva kwalokho ngoba ngumngane wami,” kutsho uMnu Mathe.
UMnu Nkomo ubikele intatheli ukuthi indaba enjalo yenzakala kodwa sebekhulumisene njalo kafuni ukuthi indaba le iphume kuphephandaba.
“Mina loMathe size sixabane sasidakiwe sonke njalo yimi engaphambanisayo ngakho sesikhulumisene, konke sokulungile, sesaxolelana ngakho kangifuni ukuthi ubhale indaba le kuphephandaba ngoba uzasidelelisa ngabantu,” kuphetha uMnu Nkomo.
