uMthunywa
Cornelius Luphahla
NOMA nje inengi labalobi kuleli sebehlehlela emuva kwezokuloba enye ingcitshi yabalobi bolimi lwesiNdebele uMihla Sitsha Tsheza usethule olunye ugwalo lwakhe lwetshumi.
Umlobi lo, usebhale ingwalo ezehlukeneyo ezinye zazo okuhlolwa ngazo abafundi abakuFomu 4 kulimi lwesiNdebele ezibalisa inkondlo, inganekwane kanye leminye imibhalo etshiyeneyo.
Umlobi lo kukhanya kapheli amandla njalo usehubela ukuba yingqungquthela ngokwayo phakathi kwabalobi bakithi.
Ugwalo lukaSitsha olutsha luthi, Idlalicatsha njalo uveze ukuthi lumumethe indlela ezitshiyeneyo imizi echitheka ngayo kulezinsuku kanye lendlela zokwenqabela lokhu.
“Ugwalo lwami lumumethe indlela imizi echitheka ngayo ngenxa yamadlecatsha,” kutsho uSitsha.
Ekhuluma lentatheli kaMthunywa uSitsha uveze ukuthi ngogwalo lwakhe lolu ujonge ukucebisa uzulu ngengozi engehlela abantu emizini yabo ngenxa yokungaziphathi kwabesilisa.
“Ugwalo lwami luhlose ukufundisa uzulu ngezizatho ezehlukeneyo ezichitha imizi kulezinsuku luphinde futhi lunike indlela uzulu angazisebenzisa ukwenqabela lokhu.
“Okwenza ngilobe kanje yikuthi ngijonge ukuthokozisa uzulu ngibuye njalo ngimxwayise ngengozi ezehlukeneyo ezingabakhona ngenxa yokungaziphathi.
Ebuzwa ukuthi kungwalo zakhe uyabe elendikimba bani uveze ukuthi ezinye ingwalo zakhe zicebisa ngomendo kukanti ezinye zikhuthaza ngobudlelwano phakathi kwabantu kungakhathalekile ukuthi ngubani.
“Ngilethemba lokuthi abantu bafunda izifundo ezehlukeneyo engwalweni zami ngoba zimumethe imfundiso emqoka empilweni yabantu,” kuchaza uSitsha.
USitsha uqhubekele phambili ebikela uMthunywa ukuthi okumenza aphumelele emsebenzini wakhe wokuloba yikuthi usebenzelana ndawonye labanye abalobi.
“Ngisebenza labalobi abanengi kakhulu ngenhloso yokuthuthuka kwezokuloba ngoba ukuze uphumelele kufanele uqale uthaphe ulwazi kubalobi abadala. Ngokuloba lokhu ngilethemba lokuthi abalobi abasacathula bafunda okunengi emibhalweni yami,” kutsho uSitsha.
USitsha uqalise ukuloba ngomnyaka ka1994 selobe ingwalo ezibalisa oluthi; “Wangenza Mntanami, Uvuna Okuhlanyelileyo, Nginjenje Nguwe, Umhlaba lo Ulamanyala, Yinkonzo bani le, Esilojeni, Izigigaba ze-whatsAphu, Ngoniwa yinkunzi kanye loluthi Umzukulu kayisilogola.”
Ezinye njalo ingwalo engazibhalayo ngezenganekwane ezithi “Abantwana Lamazimu” lelithi “Bamngcwaba ephila undwangu.”
