uMthunywa
Wayne Ncube
OKUHLE kuyabukwa, umkhokheli we ‘‘I am Khaya Foundation’’ usetshengise uzulu wakoBulawayo ukuthi yena uzimisele ukuncedisa abaphila lobugoga.
NgoMgqibelo owedlulileyo inhlanganiso ye-I am Khaya Foundation iqhube imidlalo kanobhutshuzwayo esikolo se Eveline High School lapho ebesenza khona umcimbi wokudinga imali yokuncedisa abaphila lobugoga.
UKhayelihle Khanye (25) uqale inhlanganiso yokuncedisa abaphila lobugoga i-I am Khaya Foundation ngomnyaka ophelileyo ukuze labo benelise ukutshengisa amathalenta abo kwezokuzithokozisa.
Ekhuluma loMthunywa uKhaya uveze ukuthi ukuncedisa abagogekileyo uyakuthakazelela ngakho kunengi azakwenza.
“Abantu abaphila lobugoga labo bazingcitshi kwezokuzithokozisa ngakho ngibanika ithuba lokuzibonakalisa,” kutsho uKhaya.
“Ngithabile ngempumela yangoMgqibelo ngoba besilabosaziwayo abafana loNjabulo Sibanda owayedlalela iBulawayo City, uBrain Banda umdlali weHighlanders lo Kieth Miti odlalela iBulawayo City.
“Inhlanganiso le isincede abantu abanengi abaphila lobugoga kugoqela lo Miss Deaf Zimbabwe uThandinkosi Sibanda laye okhuliswe ithalenta lakhe yinhlanganiso le,” kutsho uKhaya.
