uMthunywa
Thokozile Mbedzi
ZINATHISANA itiye izakhamizi zeGokwe ngendaba kaKhansila wesigabeni senduna uSimuchemo emiswe phambili kwedale lenduna uChireya mhlaka 20 kuyonale inyanga ngecala lokukhombisa elinye inina elendileyo walithembisa ukuba uzabe elipha umumbu ongaba ngamabhakede amabili nxa sokuyisikhathi sokuhola.
Kubikwa uKhansila uMnumzana Mazhambe Sivanda olemiyaka engu-40 waphosa ilizwi kuNkosazana Siphiwe Mudenda oleminyaka yokuzalwa engu-36 ongunkosikazi wesinye isakhamizi wamthembisa ukuthi uzamupha amabhakede amabili loba isaka lomumbu, i50kg ngaso sonke isikhathi nxa kuholwa. Waphinda wamthengela amabhisikiti, amanamunede amabili kanye lesiketi.
Omunye obekhona edale kuthoniswa udaba lolu uMnumzana James Taruvhinga uthe basamangele ngoba uMnu Sivanda ungukhansila, umuntu ohlonitshwayo esigabeni okumele ukuthi ngabe uzulu ufunda kuye indlela yokuziphatha.
“Kangilankani ngoba uSivanda ngumhlonitshwa njalo uzulu kumele afunde kuye indlela yokuziphatha kodwa yena nguye oyenza ihlazo emphakathini. UNkosazana Mudenda uthe ebuzwa edale waveza ukuba kwakumele babonane loSivanda kodwa inhliziyo yakhe yayitshaya okwenza umkakhe waze wacina embamba.
“Silapha silokhu sizibuza njalo nje ngoba kukhanya undoda lo kukhona akwenza umkakhe nanko phela amabhisikiti kanye lenamunede ubelokhu engakakudli kumbe ukukunatha sokuze kulesikhathi esedlula inyanga lesiketi laso engasigqokanga. “Abanye abamaziyo uKhansila uSivanda bathi vele yinto yakhe yokusebenzisa isikhundla sakhe ukuze ahlukuluze isifazana,” kulandisa Mnu Taruvhinga.
Ekhuluma lentatheli njalo uNkosazana Mary Mambo uthe abalankani ngesenzo sikaSivanda ngoba vele kalanhlonipho ngoba ukhuluma kubi lasenduneni yakibo.
“Ubaba lo kukhanya vele kalanhlonipho ngoba lenduneni yakhe uzikhulumela akufunayo. Yikho ehlukuluza abesifazane ebalulaza ngokubathenga ngenamunede,” kutsho uNkszn Mambo.
Induna uChiya Chireya ibuzwa ngodaba lolu ivumile yathi udaba lolu lwathoniswa edale layo njalo belulethwe yinduna uSimuchembu ukuba luzothoniswa edale lakhe.
“Udaba lukaKhansila Mazhambe Sivanda ophose amazwi kuNkosikazi Siphiwe Mudenda lwathoniswa edale lami njalo sakubona ukuthi ukhansila lo wadelela iguma lenye indoda phezu kwalokhu esebenzisa ukudla okumele kuphiwe abantu ukuba basizakale endlaleni ukugcwalisa inkanuko zakhe zemizwa. Idale limgwebe inkomo ezintathu kunye le-ZWL$1 500,” kuphetha iNduna uChireya.
