uMthunywa
Ethel Ncube
ZILOKHU zitshe amathe izakhamizi zikaWadi 5 eNyamandlovu kulandela ukutholakala kwenye indoda isilamalanga amathathu ifile emzini wayo.
Isidumbu sikaKhamisa Sibanda sitholakale sesonakele kumaviki amabili edluleyo njalo abantu bacabangela ukuthi angabe watshaywa yizinto nanko phela ngelanga abantu becina ukumbona wayeziphilele, wasetholakala ebhubhudla amagwebu.
Kubikwa omakhelwane bathi besizwa iphunga livelela lapho okwakuhlala khona uKhamisa baphanga bayafika khona kodwa bafica esekade wadlula emhlabeni.
Omunye umakhelwane kaKhamisa, uMnumzana Gift Moyo uthe batshwaqekile ngokufa kukaKhamisa.
“Umfana lo ubehlala yedwa njalo ezikhonzela esontweni yeZiyoni, ubekhuleka malanga wonke ekuseni kodwa asazi ukuthi kusuke kwangena moya bani.
“UKhamisa ubengakhanyi ngitsho njengomuntu ogulayo kodwa engabe etshaywe yizinto waswela ongamncedisa ukuthi akhuphe udenda wasesifa,” kutsho uMnu Moyo.
Uqhubekele phambili echaza ukuthi basebelamanga ambalwa bengamboni uKhamisa baze babizwa liphunga.
Iphephandaba likazulu lixhumane loNkosazana Sibekiwe Dube ongomunye owafika kuleyondawo othe bamfica esegcwele impethu.
“Sathi sifika emzini kaKhamisa samthola esewonakele, impethu sezimgcwele. Kukhona okutshaya amanzi ngokufa kwakhe, mhlawumbe waphoswa ngomunye ekukhulekeni kwakhe.
“Kubengumnyama sibili ngoba labaseduze bambone labo sebebizwa liphunga,” kutsho uNkszn Dube.
UMthunywa uphinde wakhuluma loKhansila wakule indawo, uDavid Ndlovu ovumileyo ukuthi kulomuntu owatholakala efile.
“Kulomfana owasuka eqinile esiyalala wahle walala kokuphela, omakhelwane bambona ngemva kwamalanga amathathu esefile njalo esewonakele,” kuphetha uKhansila Ndlovu.
