uMthunywa
Nkosilathi Sibanda
IPHUPHO lokudlala phetsheya lingahle litshabalale kuKhama Billiat umdlali weMamelodi Sundowns njengoba iqembu leFrance elimfunayo lingafuni ukuthi adlale kunkezo yeCaf Africa Cup of Nations (Afcon) ezaqhutshwa ngoZibandlela ka2017.
UBilliat ufunwa ngamehlo abomvu liqembu le-Lille elidlala eFrance. Iphephandaba likazulu liphethe umbiko omqoka othi iqembu leLille alifuni ukuthi uBilliat adlale kuAfcon, ikakhulu nxa esevumelane lalo. Umdlali lo kumele abeyingxenye yamaWarriors azaphatheka kulumkhankaso wenkezo enkulu kunguqu yeAfrica.
Kubikwa uBilliat umi phakathi kwelitshe lembokodo ngodaba lolu olulakho ukumtshiya engelathuba lokudlalela phetsheya.
Umgadli wamaWarriors lo usephumele egcekeni kanengi ebika ngesifiso sakhe sokulandela ezinye ingcitshi zamaWarriors ezatshiya udumo kwele-Europe ezibalisa uBenjani Mwaruwari, Peter Ndlovu, Knowledge Musona, Nyasha Mushekwi loGilbert Mushangazhike.
UMthunywa wenelise ukuxhumana loRalph Nkomo umaneja kaBilliat obike ukuba ngempela ikusasa lalumdlali lisenkingeni.
“Iqembu le-Lille kuliqiniso ukuthi lifuna ukusebenza loKhama. Inkinga ekhona yikuthi kuzakuba lemidlalo yeAfcon ngomnyaka ozayo. Kuyaziwa ukuthi amaqembu aphetsheya awathakazeleli i-Afcon ngoba athi iphazamisa abadlali,” kutsho uNkomo.
Umkhankaso weAfcon wenziwa okwenyanga yonke.
“Iqembu le-Lille lifuna isiqiniseko sokuthi uKhama ngeke adlale ku-Afcon nxa bengavumelana leqembu lakhe, iMamelodi Sundowns.
“Kunzima ukuvuma lokho ngoba iZimbabwe iyamdinga uKhama.”
UNkomo uthe uzaphinda ahlale phansi leziphathamandla ze-Lille nxa sekuphele umncintiswano we-Euro.
“Indaba le indala kakhulu. Angiboni ukuthi izalungisiswa khathesi. Amaqembu ase-Europe afuna umqhugelwano lo udlalwe ngoNhlangula.”
UBilliat uyinsika yethimu yamaWarriors ngoba ungomunye wabagadli abathenjwe ngumqeqetshi uKallisto Pasuwa.
