uMthunywa
YiNtatheli kaMthunywa
UMDLALI wenguqu ozakhele udumo kweleSouth Africa uKhama Billiat usengumdlali weDynamos yakuleli.
UBilliat, oleminyaka engu-33 yokuzalwa, odume kakhulu edlalela iqembu leKaizer Chiefs, uzalikhaba enkundleni zakuleli kusukela kulisizini njalo labakhokheli beDynamos bayakuvuma lokhu.
Ukhangelelwe ukuthi afake isayinetsha yakhe ephepheni kusiya phela iviki le. Lokhu kuza kulandela ukuphela kwesivumelwano sakhe leKaizer Chiefs, okumtshiye engelaqembu lokudlalela loba kusaziwa ukuthi ngumdlali olethalenta elinzima.
UBilliat loba esephenduka ezweni lapho azalwa khona, udabukise inhliziyo zabalandeli bakhe eSouth Africa ngokwala ukuthi avuselele isivumelwano laMakhosi, ebalisa ukuthi iholo lakhe lizabe selehlile.
Umdlalo lo uchapha umgcele esephinde wala futhi ukukhonjiswa ngamaqembu abalisa iSuperSport, Cape Town City leRichards Bay.
Intatheli zeZimpapers Sports Hub zibika ngokugcweleyo ukuthi uBilliat usendleleni yokuza kuleli, elande ukuzovumelana leDeMbare.
Kubikwa kungenzeka abekhona kumdlalo weDynamos leNgezi Platinum Stars mhlaka 24. Kuphindwe kwabikwa ukuthi usephiwe isikipa esilenombolo ka-12.
“Udaba yilo sibili. Nxa sonke sisakhumbula okwenzakala kunyanga ezedluleyo, iDynamos ike yazama ukukhulumisana lomdlalo lo, kodwa ibitshaya idwala. Okwakhathesi yikho. Uzadlalela iDynamos,” kutsho abafakazi abaqotho, abachathekele intatheli ngodaba lolu.
Kusenjalo, loKudakwashe Mahachi usehlelweni lweDynamos. Lo uvela kuqembu leMedeama, elidlala kuligi ephakemeyo eGhana.
UMahachi usuke kumaqembu abalisa iMamelodi Sundowns leSuperSport eSouth Africa.
