uMthunywa
Ethel Ncube
NGENXA yokwesaba isondlo kulenina lesiqintini se-Avoca eFilabusi elitshiye izakhamizi zimadolonzima kulandela ukuphosela usane olusanda kuzalwa esambuzini.
UPerceive Musariwa oleminyaka oleminyaka yokuzalwa engu-20 umiswe phambi komthethwandaba weFilabusi ngeviki ephelileyo esetheswa icala lokuzama ukubulala usane ngokuluphosela esambuzini.
Inkundla izwe ukuthi uMthunywa uzwe ukuthi umsolwa wathatha ingane yakhe wahamba layo waya eSidzibe wafika wayiphosela phakathi ngoba esesaba ukunakekela lingane ethi kasebenzi. Ngokutholakala kwenhlanhla izakhamizi zezwa kulomntwana okhalayo zenelisa ukumkhupha egcwele ingcekeza ephila.
UMtshutshisi uMnumzana Smart Tafire uchaze ukuthi umsolwa wenza icala lokuzama ukubulala.
“Umsolwa uMusariwa watholakala engalangane ngesikhathi kukhitshwe lolu sane esambuzini okwahle kwacaca ukuthi nguye olahle lumntwana ngoba nguye yedwa owayelomntwana omncane yikho okwenza wabotshwa,” kutsho umtshutshisi uTafire.
Ngesikhathi umsolwa ebuzwa ukuthi uyalivuma icala lakhe kazange aphike.
“Mhlonitshwa angilanduli ukuthi ngalahla umntwana esambuzini ngoba kangisebenzi, angilakho engizamgcina ngakho ngicela uxolo okwakhathesi angisoze ngiphinde ngizamphatha kuhle,” kutsho umsolwa Musariwa.
Umantshi uMzingaye Moyo utshele umsolwa ukuthi abhale incwadi kumthethwandaba ophezulu.
“Uzahlala esitokisini kuze kufike ukuthoniswa kwecala lakho, lizathonisiselwa emthethwandaba eGwanda. Bhalela umthethwandaba ophezulu ucela i-bail ngecala lakho lelo olenzileyo ngoba lokho obufuna ukukwenza kufana lokubulala,” kuphetha umantshi uMnu Moyo.
