uMthunywa
Ethel Ncube
UMHLABELELI osakhula we-Afro Pop odabuka esigabeni seMajahundeni eGwanda uPatriach Joel Welcome Manyabi usepheke idlalade elitsha elilesihloko esithi, Iphephandaba.
Umhlabeleli lo, owaziwa ngokuthi Bhila kundima yezokuzithokozisa uthe idlalade leli walipha isihloko esithi iphephandaba ngoba likhuluma ngezehlakalo ezitshiyeneyo ezenzakala empilweni zabantu okuzindaba esandise ukuzifunda kumaphephandaba.
Idlalade leli elilengoma ezilitshumi liphume ngempelaviki edluleyo.
“Ngiphekele abalandeli bami imbabazane yedlalade elithi Iphephandaba. Ingoma ezimunyethwe kudlalade leli zikhuluma ngezehlakalo ezenzakala empilweni nsukuzonke.
“Ingoma zakhona ziveza sobala ukuthi abantu kumele babelethemba empilweni njalo babekezele kuzehlakalo zempilo abahlangana lazo,” kubika uBhila.
UBhila uveze ukuthi ukuhlabela wakhula ekuthakazelela njalo waqala ukuhlabela kumaqembu ehlukeneyo enkonzweni eleminyaka eyisificamunwe munye.
UMHLABELELI osakhula we-Afro Pop uPatriach Joel
“Ngiqale ukuhlabela ngileminyaka engu-9 enkonzweni. Ngithe sengithe thuthu ngaba lilunga leqembu le-Amaculo enjabulo lapho ithalenta lami lokuhlabela elahlakulelwa khona.
“Ngananzelela ukuthi nxa ungumhlabeleli kumele ube lenjongo ukuze uphumelele yikho okumenza ayephambili. Idlalade lami lokuqala elithi Impilo ngilikhiphe ngomnyaka ka2022. Kangifisi ukubuyela emuva ngifuna ukuthi abalandeli bami bahlale bemi ngamazwane bejabulela imisebenzi yami,” kutsho uBhila.
Uphethe ngokukhuthaza abanye abahlabeleli ukuthi bangali ukuqondiswa ngabanye abahlabeleli njalo bangakhangeleli ekuhlabeleni kuphela.
“Nxa ungumhlabeleli ungakhangeleli ekuhlabeleni kuphela kodwa kumele ube lomunye umsebenzi ukuze wenelise ukuziphilisa lemuli yakho,” kuphetha uBhila.
