uMthunywa
Fairness Moyana
KULENDODA yakoBulawayo ebisileminyaka emithathu idingwa ngemva kokuhuquluza imali yezakhamizi kanye lezikolo zeBinga engaba yi$13 000 isithi izazigebhela isibholane emiswe phambi komthethwandaba wakule indawo kuyonale iviki.
U-Owen Khumalo (47) ohlala elokitshini lePumula South koBulawayo ubanjwe ngenyanga kaNhlolanja edolobheni lakoBulawayo ngomunye usomabhizimusi amqilibezela imali engange$2 920.
Umsola engakabotshwa wabikela izakhamizi ukuthi ulenkampani egebha imigodi andubana abaqambele amanga athi umtshina wakhe wokugebha ufile esethethe imali zabo.
Umsolwa umiswe phambi kukamantshi uNkosikazi Aileen Munamati esetheswa amacala amahlanu obusela andubana athi uzabhadala izikolo kanye lezakhamizi imali zazo.
Lanxa ezame ukwenza lokhu umantshi uqume ukuthi aye ejele okwenyanga ezingu-36. Phezulu kwalokho uthe isikolo seLusulu High kanye leZibubwe kumele zise indaba le emthethwandaba (civil court).
Kunyanga ezigwetshwe umsolwa umantshi wephule inyanga ezingu-12 kukhangelelwe ukuthi angenzi icala elifanayo kuminyaka emihlanu elandelayo kuthi inyanga ezingu-18 zibekwe eceleni kukhangelelwe ukuthi umsolwa abhadale omamangala i$5 050 inyanga kaMabasa ingakapheli.
Inkundla izwe ukuthi ngenyanga kaNtulikazi ngomnyaka ka2013 uKhumalo walanda umphathisikolo weLusulu High School uLizwe Mudimba wathi uyagebha imigodi waphiwa i$5 750 ngemva kokuthi athi ngeke aqalise umsebenzi lo engabhadalwanga.
Kusenjalo uthe esephakathi komsebenzi lo wathi insimbi zokugebha ugodi sezifile wahle watshaya utshani.
Kubikwa imizamo yabakhokheli besikolo lesi yokuthi bakhulumisane laye yehlula ngoba engasemukeli incingo zabo okwenza indaba le yayabikelwa amapholisa.
Mhlaka 14 kanye lamhlaka 31 Ncwabakazi waphiwa i$600 kanye le$1 950 yizakhamizi, uJotham Ngwenya kanye loElina Sikona ukuze agebhe umgodi kodwa kazange akwenze lokhu.
Kuzwakale njalo ukuthi umsolwa waphinda njalo waya esikolo seChibila Secondary mhlaka 4 Mpandula waphiwa i$1 500 yokugebha umgodi wesikolo.
Abadala bathi inja ingaqhoba ithambo iyajayela kungakho umsolwa mhlaka 27 Mpandula waphiwa i$1 000 nguAdies Mafu kodwa kazange agebhe umgodi ayewubhadalelwe.
Umtshutshisi kulelicala uMnumzana Bruce Maphosa utshele njalo inkundla ukuthi ngenyanga kaZibandlela umsolwa wahamba eLusulu komunye usomabhizimusi uPetros Zibubwe owamupha i$2 920 njalo lakuye watshiyela umsebenzi endleleni.
Umsola waze wabotshwa mhlaka 6 Nhlolanja ngemva kokuhlangana loZibubwe koBulawayo.
