uMthunywa
Cornelius Luphahla
INKOKHELI zogatsha lweMinistry of Youth Indigenisation and Empowerment kuleli ziqhubekela phambili ngokuthuthukisa intsha kwezemisebenzi yezandla kanye lokuyivulela amathuba omsebenzi ngenhloso yokuthuthukisa isizwe.
Lokhu kuvezwe yisikhulumi salolugatsha uNkosazana Sikhanyisiwe Ncube kumkhosi weZimbabwe International Trade Fare ekhuthaza intsha ukuthi iqakathekise izifundo lezi ngenhloso yokuzithuthukisa.
Ekhuluma lentatheli uNkszn Ncube uthe kulezikolo ezinengi zemisebenzi yezandla njalo sebefundise abatsha abanengi kakhulu wabuya wakhuthaza intsha ukuthi iphatheke ezifundweni lezi.
“Njengogatsha olukhangela ngokuthuthukisa intsha kuleli sesilezikolo zemisebenzi yezandla ezingu-42. Ngomnyaka ophelileyo sifundise abatsha abangu-13 429 elizweni lonke. Okunye njalo kukhona esesibafundisile sebesenelisa ukuzisebenzela bodwa njalo nxa beswele lapho abangathengisela khona impahla zabo siyabaphathisa ngokubadingela indawo zokuthengisela kanye labathengi.
“Ngokunjalo ngikhuthaza intsha yakuleli ukuthi iphatheke ezifundweni lezi ukuze ibe lekusasa enhle. Kulabo abafuna ukuphatheka ezifundweni lezi kabahlangane babe ngamaqembu kusiya ngama-wadi abahlala kuwo ngemva kwalokho baye ehofisini yeDistrict batshele uYouth Officer wakuleyo ndawo onguye ozakhuluma labakhangela ngokufundiswa kwentsha okuyikho abazakwaziswa khona ukuthi bazaqala nini ukufunda,” kutsho uNkszn Ncube.
UNkszn Ncube ubuye wathi ezifundweni lezi kuyabhalwa imihloliso njalo kudingeka umuntu oyenelisa ukubhala lokubala ukuze aphumelele.
“Ekufundeleni imisebenzi yezandla lokhu kudingakala umuntu ozimiseleyo njalo okwaziyo ukubala lokubhala ngoba kuyabhalwa imihloliso. Ngalokhu labo abangazimiselanga kabaphumeleli ngakho kuhle ukuthi abafuna ukufunda lokhu babe ngabazimiseleyo,” kuphetha uNkszn Ncube.
