uMthunywa
Cornelius Luphahla
UHULUMENDE wakuleli seqalise uhlelo lokuthuthukisa intsha yakuleli nanko phela sekhiphe imali yokuyisekela ngendlela ezehlukeneyo ezigoqela ukufundiswa imisebenzi yezandla, ukubolekwa imali zokuqala amabhizimusi kanye lokufundiswa ukuphathwa lokulondolozwa kwamabhizimusi.
Kubikwa imali le ephiwa intsha yakuleli ivele kungatsha zikaHulumende ezehlukeneyo ngenhloso yokuthuthukisa intsha yakuleli kanye lokuxhasa uhlelo lukaHulumende lweZim Asset.
UMthunywa ukhulumisane loMqondisi wentsha esabelweni seMatabeleland North uMnumzana Buthumuzi Ngwenya waveza ukuthi uHulumende uthuthukisa intsha yakuleli ukuze ilizwe lithuthuke.
“Okwenza uHulumende athuthukise intsha yakuleli yikuthi ufuna ilizwe lithuthuke. Lokhu kungenxa yokuthi nxa intsha yakuleli ithe yathuthukiswa yazisebenza kumbe yasebenza ngeke iphume iye ngaphandle kwelizwe. Ngakho nxa intsha isebenza kuleli isizwe kanye lomkhonomi welizwe uyathuthuka.
“Ngalokhu ke i-Old Mutual inike intsha yakuleli imali engange 1,6 miliyoni ukuze isebenze ukufundisa intsha imisebenzi yezandla etshiyeneyo. Okunye njalo uHulumende ukhiphe imali engange 2 miliyoni yokuthuthukisa labo asebefundiswe imisebenzi yezandla le labanye njalo abangena kwezinye inhlelo zikaHulumende,” kutsho uMnu Ngwenya.
Ekhuluma lentatheli uMphathintambo wogatsha lweYouth Indigenisation and Economic Empowerment uPatrick Zhuwao uchaze ukuthi ukuthi uHulumende ujonge ukuqeda inswelo ezihlasela intsha yakuleli.
“Ngilokujabula okukhulu ngoba uHulumende wakuleli ujonge ukuqeda inswelo ezihlasela intsha. Ngikhuluma nje ukhiphe imali yokuncedisa intsha ngakho i$75 000 izaphiwa isigodi sinye ngasinye.
“Imali le ngeyokuthuthukisa ontanga kuphela ngakho i$45 000 izaphiwa ama-constituency njalo izakuba ngeyokwakha izikolo zemisebenzi yezandla,” kutsho uKhomuredi Zhuwao.
Uphethe wathi imali le kukhangelelwe ukuthi iphathise intsha ukuthi isungule amabhizimusi hatshi ukuthi ihlale ikhangelele ukuqhatshwa kuphela.
“Le yindlela njalo kaHulumende yokugcwalisa isithembiso sakhe sokutholisa intsha imisebenzi engu-2 265 000, ngakho siyakholwa ukuthi lokhu kuzagcwaliseka,” kuphetha uKhomuredi Zhuwao.
