uMthunywa
Thokozile Mbedzi
ZILOKHU zididekile izakhamizi zelokitshini lePelendaba West koBulawayo ngemva kokuba enye indoda ihlukumeze umntwana oku Giredi 3 ithi imncedisa ukufunda izipele. Kubikwa uEric Ncube oleminyaka engu-18 yokuzalwa ongumakhelwane womntwana wabona abantwana bedlala phandle wasesithi kababuye abancedise ngezipele.
Ekhuluma lentatheli kaMthunywa uMnumzana Cleopas Nkomo uthe balokudana okukhulu ngesiga esenziwe nguEric.
“Silokudana okukhulu ngokwenzwe nguEric, ubone abantwana abangoGiredi 3 bezidlalela wafika wathi kababuye abaphathise ngezipele.
“Abantwana bagijima baya kuye waqala ukwenza engani uyabafundisa vumvu vumbu wadonsa isiketi somunye umntwana wasehlisa andubana amhlukumeze ngomunwe.
uAssistant Inspector Nomalanga Msebele
“Akulunganga lokhu okwenziwe emntwaneni, silapha kusizwisa ubuhlungu,” kulandisa uMnu Nkomo.
Isikhulumi samapholisa koBulawayo uAssistant Inspector Msebele ebuzwa ngodaba lolu uvumile wathi solufikile ehofisini yabo.
“Udaba lwendoda ehlukuluze umntwana obezidlalela labanye solufikile ehofisini yethu ngakho kuba yinto ekhathaza amapholisa ngoba amacala emacansini ebantwaneni adalwa ngabantu abaziwayo.
Abazali kabagcine abantwana bephephile ngaso sonke isikhathi babone ukuthi bavikelekile ukuze bengafinyelelwa ngabantu abangalunganga,” kuphetha uInsp Msebele.
