uMthunywa
YiNtatheli kaMthunywa
UMPHATHINTAMBO wezemidlalo kuHulumende uMakhosini Hlongwane uyakuvuma ukuthi ugatsha lwakhe luzathwala nzima ukuqedelana lezikliwi ezathengisa imidlalo kuleli.
UHlongwane uthe omantshi lamagqwetha kumele afundiswe kakutsha ukuze batholwe ulwazi lokuhlosisisa amacala okuqila lobungilimbane obubhahe kwezemidlalo kuleli.
Ukhulume lokhu ngemva kokuqoqa umhlangano wokudinga amaqhinga okuqeda ubungilimbane kwezemidlalo oqhutshelwe esigodlweni kuliviki. Umhlangano lo ubugxile kudaba lokwenqabela ukuthengiswa kwemidlalo.
Ubike engazisoli uHlongwane ukuthi ugatsha lwakhe alusoze lwenelise ukuvimba izikliwi ezithengisa imidlalo ngaphandle kokuthi babambane lezinye ingatsha zomthetho.
“Kulandela ukuzwa ngobungilimbane obugcwele kumdlalo wenguqu, umhlangano ebesilawo esigodlweni uphume lenhlelo ezedlula amatshumi amabili. Sivumelane ukuthi ngesimo esikuso, akulula ukuthi siqede ukuthengiswa kwemidlalo.
“Okwakuqala, asilawo amandla apheleleyo ukucubungula amacala, ukuwatshutshisa kanye lokuvimba ukuthi kungabi lamacala la. Okwesibili, kumele sifundise amapholisa, amagqwetha, kumbe labomantshi ngodaba lwamacala ezemidlalo la. Sivumelane ukuthi kudingwa iqula lamagqwetha azimisele ukucubungula amacala ezemidlalo. Konke lokhu kumele kusekelwe ngumthetho,” kutsho uHlongwane.
Uqhubeke wathi: “Kumhlangano wethu kuvele ukuthi kumele siqoqe i-workshop lapho esizahlala phansi lengatsha zonke ezomthetho.”
Umphathintambo lo uthe uzakhuluma labanye bakhe kuHulumende kungatsha zeHome Affairs, ezomthetho kanye leFifa ngombono wabo wokuvimba ubungilimbane.
“Kumalanga alandelayo isizwe sizakuba lomthetho ojulileyo ophathelane lokuphathwa kwamacala ezemidlalo.
“Umthetho ophathelane lezemidlalo yiwo wodwa ongavimba ukuthengiswa kwemidlalo. Okwakhathesi akulamthetho. Bonke abaqila lababheja ngemidlalo bazajeziswa ngaphansi kwalumthetho.”
UHlongwane uchaze ukuthi kuyinhloso yakhe ukuthi ancedise ezemidlalo ziguquke zibeyinsika yokuphakama komkhonomi wakuleli.
“Ingqubekela phambili kwezemidlalo ibalulekile. Ezemidlalo kumele ziphakamise impilo zabantu ngendlela eyiyo kanye lokuphatheka kumkhonomi wethu.”
Kusenjalo, kubikwa inhlanganiso ephethe umdlalo weRugby umhlaba wonke jikelele izimisele ukuhlawulela ukufundiswa kwamapholisa lezinye ingatsha zomthetho.
“Ngiyathaba ukubika ukuthi umsekeli kamgcinisihlalo weWorld Rugby uthe bayenelisa ukuthi bancedise ngokuhlawulela i-workshop yokufundisa zonke inhlangananiso lengatsha esisebenzelana lazo.”
“Umhlangano wethu usivule ingqondo, ezemidlalo kumele zikhokhelwe ngendlela elohlonzi, ngabe ezemidlalo zikhokhelwa kuhle ngabe akula bungilimbane lobu.”
Ugatsha lwezemidlalo selubike njalo ukuthi kusukela ngenyanga ezayo inkokheli zenhlanganiso zemidlalo yonke esemthethweni kuleli kumele ziveze isisekelo sombuso yimidlalo yazo emphakathini.
“Umdlalo ngomdlalo kumele ubelesisekelo sombuso esaziwayo. Asifuni abantu abakhokhela ezemidlalo sengathi bakhokhela into yabo. Konke esikwenzayo kumele kubesegcekeni,” kutsho uHlongwane.
Ezinye izikhulumi eziphatheke kumhlangano obuseHarare lo zibalisa uAnna Mguni oweZimbabwe Olympic Committee, uTommy Sithole, uStanley Mutoya umaneja weAfrican Union Sports Council Region 5 loOregan Hoskins umsekeli kamgcinisihlalo weWorld Rugby.
