uMthunywa
Njengokuthembisa kwami kuviki edlulileyo sikhangela isichasiso njalo ngoba abafundi abanengi abasizwisisi.
Funda imitsho elandelayo ecutshwe kugwalo “Isibane somfundi 3” lulotshwe nguC S Mahaja lo R Moyo.
Ngathi ngihamba phakathi kwegusu elikhulu elilezihlahla ezinde ezitshaya khonale, ngezwa ngisesaba kakhulu.
Ngafisa ukuthi nga umnewethu omdala uhamba lami lapha ukuze ngingesabi. Yena phela yisiqhwaga sendo
da emfitshane kodwa elamandla amakhulu. Izintombi ezintsha zimthandela ukuthi yindoda enhle engamadoda amabili inye.
Endabeni engaphezulu kulamagama asetshenziswe ukuchaza amabizo lezabizwana njengala: elikhulu, ezinde, omdala, emfitshane, amakhulu, ezintsha, enhle, amabili.
Amagama afana lala athethwe endabeni engaphezulu abizwa athiwe yizichasiso.
Siyini isichasiso?
Isichasiso ligama elichaza usobizo emutshweni njalo limlandela. Nxa sikhuluma ngosobizo siyabe sisitsho ibizo lesabizwana.
Isichasiso silengxenye ezimbili: isivumelwano lesiqu. Izivumelwano yizakhi esiqalisa ngazo ezichasisweni. Izivumelwano yizo ezidala umehluko phakathi kwezichasiso zemihlobo etshiyeneyo.
Mine imihlobo yezichasiso: (a) Isiphawulo (b) Isibaluli (c) Inani (d) Ubumnini
Isiphawulo
Isiphawulo yisichasiso esichaza usobizo esimlandelayo. Isichasiso laso silengxenye ezimbili, isivumelwano lesiqu.
Zilitshumi lanhlanu kuphela iziqu zesiphawulo.
Funda ikhasi leli kuviki ezayo ukuze uzibone lezo ziqu.
