uMthunywa
Thokozile Mbedzi
ZILOKHU zinkemile izakhamizi zesigabeni seMuguyaka ngaphansi kwenduna uSengwe, eChikombedzi eChiredzi ngemva kokuba enye indoda ihlahlele umfowabo ngebhemba wafa kuyonale iviki esanda kwedlula kubangwa ukuthi kalasifuba.
Kubikwa uAram Muzvimba oleminyaka engu-25 yokuzalwa uhlahlele umfowabo uEnias Muzvimba oleminyaka engu-31 yokuzalwa ngebhemba esithi kungani engela sifuba ngoba watshela amapholisa ukuthi watshontsha izifuyo eziyisithupha okwabangela ukuthi ayepika ejele inyanga eziyisithupha.
Ekhuluma lentatheli kaMthunywa uAlifios Dliwayo uthe balesithuli ngesenzo sikaAram owahamba wayapika inyanga eziyisithupha kodwa waphuma elokhu ebambe isikhwili.
“UAram wasuka etshwaleni lomfowabo, bathi besendleleni waqala ukuthonisisa umfowabo ukuthi kungani watshela amapholisa ngecala lakhe alenza ngomnyaka ka2020 lapho acina egwetshwa inyanga eziyisithupha esejele.
“Yikho lapho akhupha khona ibhemba wahlahlela umfowabo uEnias ekhanda esandleni sokunxele, esiphundu kabili kunye lesiphaqeni,” kutsho uDliwayo.
Uqhubekele phambili esithi umnawabo uBilliat wazama ukubalamula uEnias wazama ukubaleka wayazithukuza esihotsheni sezihlahla kodwa uAram wamhlala izithende waphinda wamhlahlela futhi.
“UAram wamlandela umnewabo wafika wamhlasela futhi waze wafela lapho. UBilliat wagijima wayabikela unina kodwa bathi befika ngenqola wayevele esethule,” kuchaza uDliwayo.
Indaba le yabikelwa amapholisa kwaqalwa ukuthi abantu bamdinge bencedisana lamapholisa. Kubikwa ngesikhathi belandela unyawo lwacina ukubonakala emngceleni weZimbabwe leMozambique kodwa ngenhlanhla wacina ebonakele wabotshwa.
Isikhulumi samapholisa esabelweni seMasvingo ulnspector Kudakwashe Dhewa ebuzwa ngodaba lolu uthe solufikile ehofisini yabo njalo yindaba ebuhlungu ukuthi izelamani zibulalene.
“Udaba lwendoda ebulele umfowabo kubangwa ukuthi kungani waphathisa amapholisa ngesikhathi etshontshe izifuyo solufikile ehofisini yethu ngakho kulusizi ukuba izihlobo zibulalane ngenxa yalokhu.
“Umphakathi kumele uqakathekise impilo ukuze singalahlekelwa yimpilo mahlayana. Nxa kulenhlupho abantu kabazame ukudinga usizo kubaphathi bezigaba loba amapholisa,” kuphetha ulnsp Dhewa.
