uMthunywa
Wayne Ncube
KULENDODA yelokitshini leLovendale eMguza ehlahlelwe ngehloka esihlathini lasentanyeni ngemva kokwehlula amadoda amathathu ngezandla abefuna ukungena komakhelwane wakhe kungelamvumo.
Umuyi uThulani Ndlovu obeleminyaka engu-42 yokuzalwa uhlaselwe mhlaka 15 Nhlolanja ngehola lesikhombisa ntambama ngamadoda amathathu asesezandleni zamapholisa nguRonaldo Masopo (22), Polite Khanye (24) loTalent Nkomo (24) eLovendale kubangwa ukuba ubenqabele ukungena komakhelwane.
UMthunywa uzwe ukuba uNdlovu esehlule amadoda la amthelela esephethe izikhali amhlahlela esihlathini, ekhanda kanye lasehlombe lesandleni senxele.
Isikhulumi samapholisa uInspector Abednico Ncube uthe amadoda la womathathu asebanjiwe kulandela ukubulawa kukaNdlovu obesebenza eZimbabwe Power Company eyingxenye yeZesa.
“Sesibophe amadoda amathathu etheswa icala lokubulala uNdlovu. Isidumbu sihanjiswe esibhedlela seUnited Bulawayo Hospitals ukuze siyehlolwa amanxeba asemzimbeni,” kutsho uInsp Ncube.
Uqhubekele phambili walandisa ukuba ingxabano phakathi kwamadoda la amane iqalise ngokuba umntwana wakomakhelwane egijime eqonda kuye emazisa ukuba kulejaha elizama ukungena ngakibo.
“Kuzwakale ukuthi ujaha lo esehlulwe nguNdlovu walandela uNdlovu endlini yakhe wafika watshaya umnyango. Lanxa bazama ukukhulumisana laye kazange azwisise, umngane wakhe uMasopo waze wathutsha lehloka abalisebenzisa ukuhlahlela ngalo uNdlovu,” kutsho uInspector Ncube.
Uphethe ngokucela uzulu ukuthi axekane lobudlwangudlwangu.