uMthunywa
Ethel Ncube
KULENDODA yeCowdray Park koBulawayo elimele kabuhlungu izama ukuhlahlela inina eyayithandana lalo, yehlulwa kwaganyulwa yona ubuso.
Indaba le yenzakale ngoMvulo kuyonale iviki.
Inina leli, uNomakhosi Moyo, oleminyaka yokuzalwa engu-28 ubotshwe ngecala lokuzama ukubulala indoda ake athandana layo eleminyaka engu-28 yokuzalwa.
Kubikwa indoda le, okwakhathesi ilaliswe esibhedlela seMpilo njalo isesimeni esibi.
Kuvezwe ukuba uNomakhosi lendoda le elimeleyo, badibana kwenye ibhawa edolobheni. Indoda yabuza ukuba kungani yaliwa. Kubikwa khonapho kwahle kwaba lokungezwani.
Iphephandaba likazulu lizwe ukuba ngelanga elilandelayo mhlaka 5 Mabasa, babuye bahlangana njalo yabuye yaqhamuka futhi impi yabo phandle kwebhawa.
“Kulapho indoda eyafika yazama ukuhlahlela umama lo ngehloka kodwa kwehlula. Kuthe kunjalo umama wahluthuna ihloka endodeni wayihlahlela ebusweni.
“Yopha yaze yawela phansi. Abantu bangenela bathathela uNomakhosi ihloka babiza i-ambulensi eyathatha umamangala lo yamhambisa esibhedlela seMpilo lapho alaliswe khona. Ulwela ukuphila sikhuluma nje,” kutsho umfakazi ochaze udaba.
Amapholisa akoBulawayo aluphethe udaba.
Intatheli ixhumane lesikhulumi samapholisa koBulawayo u-Inspector Abednico Ncube othe:
“Uzulu kaqaphele indaba zodlakela zingadala ukulahleka kwempilo okungakhangelelwangwa. Izikhali ozisebenzisa ekulimazeni umuntu yizo eziphenduka zikulimaze futhi,” kutsho u-Insp Ncube.