uMthunywa
Thokozile Mbedzi
NGENXA yokuthanda utshwala kulendoda yesiqintini seTshitatshawa Line eTsholotsho ehlahlele enye ngehloka ekhanda izondele ukuncitshwa utshwala mhlaka 4 kuyonale inyanga.
Umetheswacala uMeluleki Dube oleminyaka engu-32 yokuzalwa kubikwa mhlaka 4 kuyonale inyanga uhlahlele uFrancis Ndlovu oleminyaka engu-51 yokuzalwa ngehloka kubangwa ukuthi wale ukunatha laye utshwala bakhe.
Ekhuluma lentatheli kaMthunywa uNkosazana Sibahle Ngwenya uthe lokhu bethithibele ngesenzo sikaDube ukuthi ubengaze abulale umuntu ngoba encitshwe utshwala.
“UDube wacela ukunatha loNdlovu utshwala kodwa wala ngoba utshwala lobo wayezithengele, yena wazonda wasuka elabhula izandla esiya emzini wakhe.
“Kuthe ngehola lika-8 ntambama wabuya esehlome ngehloka wafika wahlahlela uNdlovu kanye esiphaqeni leceleni kwesandla senxele ekhanda wahle wawela phansi wamdonsa wayamtshiya eceleni kwesambuzi.
“Omunye laye owayezinathele uthe esiyazikhulula wathola uNdlovu eceleni kwesambuzi wasebiza abantu kwabikelwa amapholisa,” kulandisa uNkszn Ngwenya.
Isikhulumi samapholisa esabelweni seMatabeleland North ulnspector Glory Banda ebuzwa ngodaba lolu uvumile wathi solufikile ehofisini yabo.
“Udaba lwendoda egamule enye ngemva kokuxabana kubangwa utshwala solufikile ehofisini yethu.
“UDube usesezandleni zamapholisa njalo uFrancis usesimeni esibi esibhedlela seTsholotsho.
Uzulu uxwayiswa ukuba engabosebenzisa udlame nxa kulokungazwisisani,” kuphetha uInsp Banda.
