uMthunywa
Cornelius Luphahla
NGENXA yokuthanda inyama kulendoda yeChibila eBinga esezandleni zamapholisa kulandela ukuhlahlela enye ngehloka ekhanda yaze yayavukela esibhedlela kubangwa inhloko yenkomo.
Isiga lesi senzakale kuviki ephelileyo lapho uGibson Mwinde ogamule khona uMnumzana Brighton Dube bebanga ukuthi kungani uDube ethethe inhloko yonke ebiphekwe nguMnumzana Japhet Nyoni.
UMthunywa uxhumane loMnu Nyoni waveza ukuthi ababili laba bamncedise ukuhlinza inkomo yakhe ebisicubile wasesithi bezothatha inhloko ingavuthwa okuyikho okudale impi le.
“Mina ngicutshelwe yinkomo yami ngoMvulo kuviki ephelileyo ngasengincediswa nguMwinde loDube ukuyihlinza kanye lokuyithwala. Ngemva kwalokho ngabapha amatshontsho ngabuya ngathi babuye bezothatha inhloko ngisayipheka.
“Kuthe ngoLwesibili sivuthiwe ngatshiya ngilayezele ukuthi bengabuya babaphe inhloko ngoba mina bengisiya esivandeni sami. Wabuya ke uDube wafika wathatha inhloko yonke ethi uzadlula etshiya enye koMwinde kasayitshiyanga,” kulandisa uMnu Nyoni.
“Kuthwa uMwinde usuke lapho waqonda koDube elanda inhloko uDube wafika wamncitsha kwahle kwaqala impi phakathi kwalaba. UMwinde uthe sebona ukuthi uyehlulwa wadobha ihloka wagamula uDube ekhanda wawela phansi. Ngemva kwalokho wangena emkulwini wathatha inyama yenhloko yonke wayayidla emzini wakhe,” kutsho uMnu Nyoni.
UNkosazana Grace Ndlovu ongumka Mnu Dube uchaze ukuthi ngemva kokuganyulwa komkakhe bamthwalela esibhedlela njalo lokhe elalisiwe.
“Ngemva kokuba uMwinde egamule umkami sahle samthwalela esibhedlela seLusulu lapho afika bamdlulisela esibhedlela seBinga okuyikho akhona khathesi. Lokhu kwangizwisa ubuhlungu kakhulu kodwa kuhle ngoba uMwinde samusa epholiseni ngakho usazosibhadala ukuze simxolele,” kutsho uNkszn Ndlovu.
Imizamo yokukhulumisana loMnu Mwinde yehlule ngoba ucingo lwakhe lwalile ukungena.
