uMthunywa
Fairness Moyana
KULENDODA elabantwana abayisithupha yesigabeni seTiki eLupane egwetshwe ukuyapika iminyaka engu-13 ejele emthethwandaba weHwange ngemva kokutholakala ilecala lokudlwengula indodakazi yayo okweminyaka emihlanu okubangele ukuthi acine ezithwala. Kubikwa umkamsolwa ebesazi mhlophe ngesenzo somkakhe.
Indoda le kubikwa ileminyaka engu-36 njalo yaqala ukulya emacansini lomntanayo eleminyaka engu-13 waze wayakwenda ezama ukubalekela ukuhlukuluzwa lokhu kodwa akuzange kwamsiza ngoba uyise ubelokhu embiza ngemva kwensuku ezintathu.
Kubikwa umsolwa wayethi nxa umntanakhe esala ukulala laye amthembise ukumbulala kumbe ukumnyamalalisa okuyikho okwadala ukuthi umntanakhe ahlale isikhathi eside engabikeli muntu ngale indaba.
Umantshi uDambudzo Malunga ugwebe umsolwa iminyaka engu-15 ethi ngeke amzwele ngoba ulolunya lwenyoka.
“Uyindoda elomoya kakhulu ngoba kufanele ukuthi uvikele umntanakho wena uyamdlwengula aze azithwale okutshengisa ukuthi ugangile sibili. Khangela khathesi umntanakho sezithwele ngenxa yakho, ngalokhu-ke ngizakugweba iminyaka engu-15 kuthi emibili ngizayephula ngoba ube lokuhlonipha okukhulu,” kutsho umantshi uMalunga.
Kubikwa noma nje umntwana lo ubesezithwele isisu esilenyanga ezintathu umthethwandaba ubophe ukuthi umthwalo lo ukhutshwe esibhedlela seMpilo.
Ekhuluma emthethwandaba, umkamsolwa uchaze ukuthi wayesesaba ukubikela amapholisa mayelana lale indaba ngoba esesaba ukuba umkakhe engambulala njengomuntu owaziwayo ukuthi ulodlame.
“Ngiyayazi indaba yokuhlukuluzwa komntanami nguyise ngoba nsukuzonke ubethi nxa esiyalala laye angitshele kodwa ngangiswela ukuthi ngenzeni njengoba ngangisazi ukuthi uzangitshaya. Okunye njalo wayehlala engithembisa ukuthi ngingakhuluma uzangitshaya angibulale kanye lomntanami. Ngathula ngoba ngangisazi ukuthi umkami ulolaka kakhulu. Yikho-ke ngingazange ngibikele muntu,” kutsho umama lo ekhala.
Umthethwandaba uzwe ukuthi ngomnyaka ka-2014 umsolwa wabikela umamangala ukuthi sefuna ukuyalala laye khonapho besemkulwini kodwa unina kamamangala kazange atsho lutho ngoba esesaba.
Umtshutshisi uMnumzana Tawanda Sigauke ubikele umthethwandaba ukuthi ngemva kokuya emacansini lomamangala, umsolwa waphinda njalo wayamhlukuluza.
“Kwathi ngemva kokuba umsolwa ethe ufuna ukuyalala lomamangala wasemlandela endlini yakhe yokulala wamthola elele labanawakhe abahlanu wafika wamvusa wathi kavuke. Umamangala wala noma nje uyise wamthembisa ukumbulala kodwa waphetha esehlulwa okwadala ukuthi uyise ambambe njalo,” kutsho umtshutshisi uTawanda Sigauke.
Umtshutshisi uqhubekele phambili njalo wachaza ukuthi kusukela khonapho umsolwa wayesehlala esiya emacansini lendodakazi yakhe ngenkani.
Kubikwa ngomnyaka ka-2015 ngemva kokuba umamangala sendile uyise wayesithi kufanele azobavakatshela ngemva kwamalanga amathathu okwadala ukuthi umkakhe aphethe sekwala lokhu.
Kubikwa umsolwa ubebiza umamangala ukuthi azovakatsha yena esazi mhlophe ukuthi ufuna ukumdlwengula.
Umamangala kubikwa konke lokhu kusenzakala ubengatsheli muntu ngoba unina ekwazi kodwa engenzi lutho ngoba esesaba.
Kubikwa ngenyanga kaZibandlela lonyaka umamangala wabikela uyise ukuthi usezithwele wamlaya ukuthi angatsheli muntu kube yimfihlo yakhe ngoba ezadinga umuntu omdala ozamkhipha isisu leso.
Kusenjalo engakathathi amanyathelo indaba le yaphumela egcekeni ngemva kokuba ababengababalisi bakamamangala bebone ukuthi kukhona okutshaya amanzi. Ababalisi laba bambuzisisa wachaza ukuthi uzithwele umthwalo kayise.
Umbalisi lo kubikwa wamhambisa emapholiseni eVictim Friendly Unit eLupane ayiwo ahle avula idokhethi elenza uyise wabotshwa.
Uyise kamamangala obeke wavuma icala ucine sesithi uqanjelwa amanga ngumkakhe lendodakazi yakhe ngoba bemzonda.
