uMthunywa
Thokozile Mbedzi
ZILOKHU zibabaza izakhamizi zendaweni yamabhizimusi akoJoel eZhombe ngemva kokuba enye indoda ibulele enye kuviki ephelileyo kubangwa intombazana eleminyaka engu-15 yokuzalwa.
Kubikwa uNorman Sibanda weMakamera Compound, e-Empress eZhombe, wayekhelela umagwebu lentombi yakhe kwenye ibhawa kwasekuthutsha uObadia Mhaka (26) wesiqintini seChihota, eGokwe wakhombisa intombi leyo okuyikho okwabangela ukuthi baxabane.
Kubikwa uSibanda walanda uMhaka wamsola ngesenzo sakhe baxabana okuyikho okwabangela ukuthi bacine sebesilwa.
USibanda kubikwa wabambana lomunye okutholakale ukuthi nguAndrew nje kuphela ovela esigabeni seMatshabela ngaphansi kwenduna uNtabeni.
uInspector Emmanuel Mahoko
Kubikwa abathathu laba balwa kwaba kubi uMhaka wakhipha ingqamu wagwaza uSibanda entanyeni wahle wafela lapho.Indaba le yabikwa emapholiseni abuya azochwayisisa. Isikhulumi samapholisa eNkabazwe uInspector Emmanuel Mahoko ufakaze ngendaba le.
“Amapholisa abophe uObadia Mhaka owetheswa icala lokugwaza, abulale uNorman Sibanda kubangwa intombi eleminyaka engu-15.
“Sidinga njalo uAndrew okungasatholakalanga isibongo sakhe kodwa laye owaba lesandla kuleli icala. Ongabe esazi ukuthi ungaphi sicela abikele amapholisa aseduzane laye,” kuphetha uInsp Mahoko.
