uMthunywa
Ethel Ncube
ZISAKHAKHAMELE izakhamizi zeDufuya eLower Gweru ngemva kokuba enye indoda igwaze enye etshwaleni ngempelaviki yafa kubangwa isikhwili sakudala.
Umuyi uWillard Ntini udlule emhlabeni ngemva kokugwazwa nguTinashe Pavari ngengqamu esifubeni.
Kuvele ukuba mhlaka 1 Mfumfu ngehola lika-8 ebusuku umuyi uWillard Ntini kunye loNobert Chunga oleminyaka engu-24, Xolani Ncube oleminyaka engu-31 lo Anele Sogwala oleminyaka engu-29 babezinathela utshwala ebhawa eyaziwa ngokuthi kukoNjinga Skhovo eDufuya.
Kubikwa ngaleso sikhathi umetheswacala uTinashe Pavari walanda uNtini wambuza ngesikhwili sakudala baqala ukulwa.
Belokhu besilwa abangane bakaNtini, uSogwala, Ncube loChunga bazama ukukhulumisana lalaba ukuze bangalwi kodwa umetheswacala wakhupha ingqamu wagwaza uNobert emhlane.
UNobert labangane bakhe babaleka, kodwa uPavari, Muzimkhulu Tshuma loTendai Tshuma balandela uNtini bamgwaza esifubeni bamtshiya ethe daca phansi.
Ngobusuku obufanayo ngehola lika-11, uXolani wathi esesiya ngakibo wafica uNtini elele phansi esopha wahle wayabikela amapholisa.
Isidumbu sathwalelwa esibhedlela seGweru General Hospital kukanti umngane wakhe uNobert lokhe elalisiwe esibhedlela.
UMthunywa uxhumane lesikhulumi samapholisa eMidlands uInspector Emmanuel Mahoko oveze ukuba bakhona asebebotshiwe ngenxa yecala leli.
“Indaba le isezandleni zamapholisa njalo sesibophe uTendai Tshuma ikanti uTinashe Pavari loMuzimkhulu Tshuma lokhe bengakabotshwa.
“Sikhuthaza uzulu ukuba nxa elombiko kumbe udletshana olunganceda ukuba babanjwe babikele amapholisa aseduzane labo. Abantu kabahloniphe impilo, ingozi le ibingavikeleka,” kubika uInsp Mahoko.
