uMthunywa
Ethel Ncube
IYINDABA esegudwini elokitshini leNkulumane koBulawayo, indaba yowesilisa ogwaze omunye wafa ngemva kokuxabana kubangwa elinye inina eligida ebhawa.
Indaba le yenzakale ngeviki ephelileyo lapho umuyi uInnocent Mlambo egwazwe ngensimbi engaziwayo ngamadoda amane angazakaliyo ukuthi ngobani ngemva kokuxabana kubangwa elinye inina.
Kubikwa ukuba uInnocent Mlambo oleminyaka engu-19 yokuzalwa utholakale esedlule emhlabeni ngenye indoda ebisedlula.
Kuzwakale ukuthi uMlambo waphuma ibhawa isivalwa kodwa uthe esephandle waxabana lamadoda amane kubangwa omama abasebenza ebusuku.
Kubikwa ngaleso sikhathi uMlambo wagwazwa ehlombe kucele lesandleni sokunxele ngensimbi engazakaliyo waqala ukopha waze wawela phansi.
Bebona esethe daca phansi bacela ezinyaweni.
Isidumbu sathwalela emotsha ye-United Bulawayo Hospital.
United Bulawayo Hospitals
UMthunywa uxhumane lobambele isikhulumi samapholisa koBulawayo uAssistant Inspector Nomalanga Msebele obike ukuba udaba olunjalo balalo.
“Sichwayisisa ngodaba lapho okubikwa amadoda amane agwaza enye indoda eNkulumane yafa.
“Sikhuthaza uzulu ukuba katshiyane lodlame ikakhulu nxa benathile. Khethani indlela ezingcono zokuxazulula indaba nxa kulokungazwisisani hatshi ukuthatha umthetho liwufake ezandleni zenu ngoba kungaqala kuyikutshiyana nje kucine sokulokufa phakathi.
“Sicela uzulu asincedise ukuze senelise ukubopha abane abacatshangelwa ukuthi balesandla kulelicala. Ongabe elolwazi angabikela amapholisa aseduzane laye,” kuphetha uInsp Msebele.
