uMthunywa
Intatheli kaMthunywa
BASELE bethithibele abafundi beGreat Zimbabwe University eMashava ngemva kokuba omunye umfundi ehlaselwe wagwazwa bezama ukumdlwengula kanye lokumtshontshela.
Isiga lesi senzakale ngoMgqibelo odluleyo lapho abafundi beNyunivesithi ababili abangamankazana okungatholakalanga amabizo abo abazwakale sebehlaba umkhosi sokungene umuntu wesilisa efuna ukubabamba iganyavu njalo abathathele lamakhompuyutha. UMthunywa uzwe ukuba isela leli langena kule indlu ehlala abafundi lacela ukuhlangana labo emacansini kodwa bayala andubana baxabane wagwaza omunye umzimba wonke.
Esinye isakhamuzi sakule indawo sikhuluma lentatheli uMnumzana Tendakwashe Dzikwa uchaze ukuthi yena wavuswa ngumsindo waphanga wayafika kuleyondlu.
“Mina ngezwa umkhosi ngavuka ngayafika kuleyondlu ngathola umfundi eselele phezu kwedamu legazi engasakhulumi emanxebanxeba umzimba wonke. Omunye owalwisana lesela leli wayengalimalanga njalo nguye owachaza ukuba umuntu bambone esephakathi endlini wacela ukuya emacansini lalo owayeselimele kanye lama-laptop.
“Lelosela kubikwa lanxa lazama ukubamba oyedwa iganyavu kodwa balikhulela lacina libaleka selisizwa omakhelwane sebesiza kule indawo,” kulandisa uMnu Dzikwa.
UMthunywa uphinde waxhumana loNkosazana Ellen Moyo yena oveze ukuba lindaba yenzakala.
“Kulomfundi owagwazwayo umzimba wonke yisigebenga esabangenelayo. Lathi umsindo sawuzwa becela uncedo savuka sagijima sathola umuntu wakhona esebalekile esetshiye elimaze omunye wabafundi. Okungisolisayo yikuthi banengi abafundi abahlala kuleyo ndawo kodwa abazange bavuke ngesikhathi ukuze basize abanye babo okwacina kudala ukuba omunye aphose abangwe lezibi abantu bekhona eduze,’’ kutsho uNkszn Moyo.
Iphephandaba likazulu likhulumisane lesinye isisebenzi seGreat Zimbabwe University uDean of Students uNkosazana Mudavanhu othe kukhulunywe labakhangela ngemibiko.
“Ngena ebulenjini ubuze abemibiko,” kutsho uNkszn Mudavabanhu.
Imizamo yokukhulumisana lesikhulumi samapholisa eMasvingo yehlule ngoba sibambekile emhlanganweni.
