uMthunywa
NJENGANSUKUZONKE kuliviki iphephandaba likazulu lize lazo njalo ezimnandi ezokujabulisa umphakathi ngezimnandi njengoba nje lidume ngazo. Lamhlanje lize lejaha mdabuko elicula i-hip-hop kuvungame umphakathi kuzamazame umhlaba.
BakaMalandela kambe ngubani odume ngendaba ezimnandi kangaka lapha koMthwakazi ngaphandle kwejaha elimajaha mabili uNkanyiso Moyo odume ngokuthi nguGuluva 7. Othanda ukuzithokozisa nansi ingxoxo ehlabusayo phakathi kwentatheli yephephandaba likazulu uCornelius Luphahla (CL) lomculi wodumo lo uNkanyiso Moyo (NM).
CL: Jahelibanzi akutsho ngamafitshane mayelana lembali yakho kanye leyomculo wakho?
NM: Mina ngazalwa mhlaka 7 Mpandula ngomnyaka ka1987 esibhedlela seMpilo koBulawayo. Ngakhulela elokitshini lePhelandaba kwathi ngo1995 ngayafunda uGiredi 1 eMilton Junior Primary School ngaze ngayaqeda uGiredi 7 ngo2001. Kwathi ngo2002 ngayafunda uFomu 1 eMzingwane High School ngaze ngayaqeda ngo2005.
Ngaqhubekela phambili ngezifundo zami kwathi ngomnyaka ka2006 ngayafunda uFomu 5 eGifford High School ngaze ngayaqeda uFomu 6.
Ngemva kwalokho ngaqhubekela phambili ngezifundo zami ngayafundela iApprenticeship eZisco Steel eKwekwe ngo2010 ngaze ngayaqeda ngo2014. Ezokucula ngaziqala ngo2004 ngisafunda lapho engangiphatheka emaqenjini e-drama kanye lawomculo we-kwaito afana lelithi No skim. Ngo2007 ngaqala ukuhlabela ngedwa okuyikho engaba nguGuluva 7 khona.
CL: Njengomculi wodumo akutsho jahelidala ukuthi sowakhipha amadlalade amangaki njalo sowathola sicoco bani?
NM: Lokhe ngaqala ukucula sengakhipha ama-single ayisikhombisa agoqela ethi Size Kuparty eka2005, ethi Noma Kanjani eka2006, ethi Ilife Yimpilo eka2008, ethi All sweat and no play eka2009, ethi Kasi Slanging eka2010, ethi Daza to Topola engayikhipha ngo2014 engayikhipha loCalvin lethi Amatshankura eka2014 njalo. Kwathi ngo2015 ngakhipha idlalade elilodwa elithi Colour of Dreams okuyilo engacina ngalo.
Izicoco esengizitholile kusukela ngiqalisa ukucula zimbili, esokuqala ngasithola ngo2015 ngemva kokuba yingcitshi kulabaculi bonke abatsha abe hip-hop kuleli ngabuya njalo ngathola isicoco sokuba yingcitshi njalo kubaculi bonke be-hip-hop abalapha eZimbabwe.
CL: Tshela abantu ukuthi abantu bathini ngomculo wakho njalo ukhangelele ukubenzelani lonyaka kwezomculo?
NM: Abantu bayawuthakazelela kakhulu umculo wami njalo bangikhuthaza ukuthi ngiqhubekele phambili ngingadeli ngoba ngiyabajabulisa kakhulu. Ngalokhu lonyaka ngikhangelele ukuvakatshela indawo ezehlukeneyo ngitshengisa abantu ukuthi ngidume ngani. Okunye njalo ngikhangelele ukukhiphela uzulu ividiyo yedlalade lami elithi Colour of Dreams ukuze bazibonele njalo ukuthi ngenzani njengoba behlala bengizwa ngodumo.
CL: Umphakathi uthanda ukwazi ukuthi ingoma zakho wandise ukuzitshayela ngaphi njalo ngaphandle kokucula msebenzi bani owenzayo mfoka Moyo?
NM: Mina ingoma zami ngandise ukuzitshayela endaweni ezifana lemikhosi enjenge Music Carnival, emadilini okuzalwa, emitshadweni, kuma-shows kanye lakweminye imikhosi etshiyeneyo. Ngaphandle kokucula mina akulamsebenzi engiwenzayo ngiphila ngokucula.
CL: Bunzima bani oyake uhlangane labo njengomculi njalo nkuthazo bani oyipha abaculi abasacathula?
NM: Ubunzima engiyake ngihlangane labo njengomculi yikuthi inengi labantu bakoMthwakazi basuka balandele abaculi bakwamanye amazwe badele abaculi bakuleli asazi kumbe kalazi ukuthi lathi siyenelisa ukuhlabela njengabaculi baphetsheya.
Inkuthazo engiyipha abaculi abasacathula yikuthi bengadeli ukucula njalo bengazeyisi kabazithembe kwezomculo. Okunye njalo ngibakhuthaza ukuthi bahloniphe uzulu ukuze bathole ukuhlonitshwa okuzabanika ukuthuthuka.
